Qarjy mınıstrligi Ulttyq qor qarajatyna «Qazatomónerkásip» aksııalaryn satyp alý josparyna qatysty túsinikteme berdi, dep habarlaıdy Egemen.kz.
Mınıstrliktiń baspasóz qyzmeti áleýmettik mindettemelerdi qarjylandyrýdy qamtamasyz etý maqsatynda memleket Ulttyq qor qarajatyn salýǵa bolatyn qarjy quraldarynyń tizbesin keńeıtkenin atap ótti.
Bul týraly Úkimet qaýlysy 2024 jyly 14 maýsymda kúshine endi. Al bul qujatqa sáıkes, Ulttyq bank Ulttyq qor esebinen «QazMunaıGaz» UK aksııalarymen birge endi «Qazatomónerkásip» UAK-nyń baǵaly qaǵazdaryn satyp ala alady. Alaıda mınıstrlik olardyń «Qazatomónerkásip» aksııalarynyń qansha paıyzyn satyp alýdy josparlap otyrǵanyn naqtylamaǵan.
«Ulttyq qordyń negizgi maqsaty – turaqtandyrý fýnksııasy – respýblıkalyq bıýdjettiń álemdik baǵa konıýnktýrasyna táýeldiligin tómendetý. Ulttyq qor bolashaq urpaq úshin jınaqtardy qalyptastyrý arqyly jınaqtaý qyzmetin de atqarady. Ulttyq qor qurylǵan sátten bastap alǵa qoıǵan maqsattarǵa jetý úshin birqatar mańyzdy sharany júzege asyryp, barlyq mindettemelerdi tıisinshe oryndap keledi. Qordyń basty mindetteriniń biri – bolashaq urpaq úshin kiristi jınaqtaý jáne ulǵaıtý bolsa, ekinshi mańyzdy mindet – ony qazirgi urpaq úshin paıdalaný», dep túsindirdi Qarjy mınıstrligi.
Mınıstrlik mundaı jaǵdaıda álemdegi eń iri ýran kompanııalarynyń biriniń baǵaly qaǵazdaryn satyp alý qısyndy áreket sııaqty kórinetinin atap ótti.
Aıta keterligi, qazirgi tańda ýran ónerkásibi tartymdy ınvestısııalyq salalardyń biri. 5 jyl ishinde «Qazatomónerkásip» UAK» AQ paıdasy úsh ese ósti (2019 jyly paıda 318 mlrd teńgeni, 2022 jyly – 929 mlrd teńgeni qurady). Sońǵy úsh jylda ýran baǵasy bir fýnt úshin 29 dollardan 106 dollarǵa deıin ósti (úsh eseden astam), sondyqtan bul faktorlar ýran kompanııalary aksııalarynyń qunynyń ósýine ákeledi.
«Atom energetıkasy elektr energııasyn óndirýdiń eń turaqty jáne tıimdi ádisteriniń biri bolyp qala beredi, ásirese klımattyń ózgerýine qarsy kúres jáne taza energııa kózderine kóshý ýranǵa suranysty arttyrady. Bul rette, aǵymdaǵy qarjy jylyna arnalǵan kiris boljamy neǵurlym qolaıly baǵalaýlarǵa negizdelgenin atap ótken jón. Qazirgi ýaqytta negizgi eksporttyq metaldarǵa baǵanyń syrtqy jaǵdaıy tómendegenin kórsetedi: myrysh – 6,8%-ǵa, qorǵasyn – 0,4%-ǵa, ımport – 7,3%-ǵa, munaı óndirý boljamnan 95,4 mln tonnadan 90,3 mln tonnaǵa deıin tómendedi (onyń ishinde osy jyldyń 6 aıynda 2,3 mln tonna) jáne t.b.», dep naqtylady Qarjy mınıstrligi.
Bul tendensııa óz kezeginde, respýblıkalyq bıýdjetke túsetin túsimderdiń tapshylyǵynan kórinedi. Ulttyq qordy ýran salasyna ınvestısııalaý qorjynymyzdy ártaraptandyrýǵa múmkindik beredi.
Aıta keteıik, «Qazatomónerkásip» UAK» AQ álemdegi eń iri resýrstyq bazalardyń birine qol jetkizgen tabıǵı ýrannyń álemdegi eń iri óndirýshisi. «Qazatomónerkásip» ýrandy tek Qazaqstan Respýblıkasynyń aýmaǵynda óndiredi jáne 300 myń tonnany quraıtyn saladaǵy eń iri ýran qory bazasy bar.