Eńbek jáne halyqty áleýmettik qorǵaý mınıstri Svetlana Jaqypova Almaty oblysyna jumys sapary aıasynda óńir aktıvimen kezdesý ótkizdi. Alqaly basqosýǵa Almaty oblysy ákiminiń orynbasary Rýstam Isataev, oblystyq máslıhat ókilderi, qalalar men aýdandardyń ákimderi, oblystyq departamentter men basqarmalardyń basshylary jáne taǵy basqalar qatysty.
Jıyn barysynda S.Jaqypova Memleket basshysynyń áleýmettik-eńbek salasyndaǵy tapsyrmalarynyń iske asyrylýy týraly baıandady. Atap aıtqanda, bazalyq zeınetaqynyń kezeń-kezeńimen ulǵaıýy, yntymaqty zeınetaqyny esepteý úshin eń joǵary tabystyń kóbeıýi, Áleýmettik kodeksti iske asyrý aıasynda áleýmettik qoldaý sharalarynyń kúsheıýi, Otbasynyń sıfrlyq kartasyn engizý nátıjeleri, el azamattaryn jumyspen qamtý boıynsha qabyldanyp jatqan sharalar jóninde baıandady.
Sondaı-aq mınıstr eń tómengi jalaqyny anyqtaýdyń jańa ádistemesi, 2023–2027 jyldarǵa arnalǵan kóshi-qon saıasatynyń, 2024–2029 jyldarǵa arnalǵan eńbek naryǵyn damytý, 2030 jylǵa deıingi qaýipsiz eńbek tujyrymdamalary týraly da tarqatyp ótti. Uzaq ýaqyt boıy zııandy eńbek jaǵdaılarynda jumys istegen adamdardy áleýmettik qorǵaýdy kúsheıtý, múgedektigi bar adamdardyń ómir súrý sapasyn arttyrý boıynsha qabyldanyp jatqan sharalar jáne platformalyq jumyspen qamtýdy retteý boıynsha júrgizilip jatqan jumystar jaıy tilge tıek boldy.
Kezdesý barysynda S.Jaqypova óńirdegi aǵymdaǵy jaǵdaıdy talqylap, birqatar problemany sheshý joldaryn usyndy. Máselen, Almaty oblysynyń halyq sany 1,5 mln adamdy quraıdy, onyń 16%-y (246 myń) – qalalyq, 84%-y (1,3 mln) – aýyldyq. 2050 jylǵa qaraı halyq sany 61%-ǵa artyp, 2,4 mln adamǵa jetedi. Jumys kúshiniń sany – 751 myń adam, 2050 jylǵa qaraı 1,1 mln adamǵa (+44%) deıin ósedi. Búgingi tańda jaldamaly jumyskerlerdiń úlesi – 68%, ózin-ózi jumyspen qamtyǵandardyń úlesi 32%-dy quraıdy. Jumysqa jaramdy jastar sany – 400 myń adam (56%). Ulttyq statıstıka bıýrosynyń málimetteri boıynsha jumyssyzdyq deńgeıi 4,6%-dy quraıdy. О́ńirdegi ortasha jalaqy – 227,4 myń teńge, bul jalpy respýblıkalyq kórsetkishten tómen.
«О́ńirde akýsher-gınekologterdiń, neonatologterdiń, pedıatrlar men anestezıolog-reanımatologterdiń tapshylyǵy, sondaı-aq aýyldyq okrýgter mamandarynyń kompıýterlik saýattylyǵynyń tómen deńgeıi baıqalady. Memleket shyǵyndary 164,3 mlrd teńgeni quraıtyn ulttyq jobalardy iske asyrý sheńberinde jyl basynan bastap respýblıka boıynsha 2,4 myń jumys orny nemese onyń jalpy sanynyń 4% ǵana quryldy», dep atap ótti mınıstr.
Sala basshysy medısınalyq mamandyqtar boıynsha kadrlardy daıarlaýdy ulǵaıtýdy jáne onlaın-oqytý arqyly qyzmetkerlerdiń kompıýterlik saýattylyq deńgeıin arttyrýdy usyndy.
«Jyl saıyn qurylatyn sapaly jumys oryndarynyń sanyn 2024 jylǵy 98 myńnan 2029 jyly 160 myńǵa deıin ulǵaıtý qajet. 2025 jylǵa qaraı jumyssyzdyq deńgeıin 4,5%-ǵa deıin tómendetýdi, ekonomıkadaǵy orta kásipkerlik úlesin 21,1%-ǵa deıin ulǵaıtýdy qamtamasyz etý mańyzdy. Halyqty jumyspen qamtý salasynda memlekettik qoldaýdyń barlyq quralyn qoldaný qajet», dedi ol.
Almaty oblysynyń aktıvimen kezdesýde S.Jaqypova áleýmettik-eńbek salasynyń birneshe aqparattyq júıesiniń múmkindigin kórsetti. Mınıstr otyrysqa qatysýshylardy Eńbek táýekelderiniń sıfrlyq kartasymen jáne eńbek qatynastary jáne eńbek qaýipsizdigi men eńbekti qorǵaýdy qamtamasyz etý salalarynda monıtorıng pen baqylaýdy júzege asyrýǵa múmkindik beretin Kásiporyndardyń sıfrlyq kartasymen tolyqqandy tanystyrdy. Qazaqstandyqtardyń ál-aýqaty deńgeıin anyqtaýdyń jáne proaktıvti formatta memlekettik qoldaý sharalaryn kórsetýdiń negizgi quraly retinde Otbasynyń sıfrlyq kartasyna jáne halyqty jumyspen qamtý salasynda qyzmetter men múmkindikterdiń keń spektrin usynatyn Elektrondyq eńbek bırjasyna erekshe nazar aýdaryldy.
Almaty oblysy