«Sý – tilsiz jaý» degen. Talǵar aýdany Keńdala aýlyndaǵy Úlken Almaty kanalyn (ÚAK) jaǵalap júgirip júrgen kishkentaı balapannyń aıaqasty aǵyny qatty sýǵa qulap, aǵyp bara jatqanyn baıqap qalǵan Serikjan Sembaıulynyń esh kidirmesten sýǵa qoıyp ketip, balanyń ómirin saqtap qalǵan erligi lezde elge tarady.
«Kúndizgi 11 shamasynda sol mańaıda páter izdep júrgen edim. Kópirden ótip bara jatyp kishkene balalardyń janushyrǵan daýsyn estigen kúıde sý jaǵasyna júgirdim. Qarasam bala aǵyp barady. Birden kómekke umtylyp, jaǵaǵa alyp shyqtym. Bala sýǵa tunshyǵyp, álsirep qalǵan eken. Meniń ornymda basqa adam bolsa da osylaı eter edi», – deıdi balany ajaldan aman alyp qalǵan Raıymbek aýdany Narynqol aýlynyń týmasy Serikjan Botan.
Qaterden bala ómirin saqtap qalǵan 28 jastaǵy azamattyń bul erligin Talǵar aýdanynyń ákimi Tanat Aıdarbekov eskerýsiz qaldyrmaı, alǵysyn aıtyp, baǵaly syılyq tabys etti.
«Osyndaı baǵa jetpes adamgershilik qasıetińizge jáne sýǵa batqan balany qutqarǵan erlik isińiz úshin alǵys bildiremin. Qyraǵylyq pen erjúrektikke baýlyp ósirgen ata-anańyzǵa da rızashylyǵymyz sheksiz. Sizge jáne jaqyndaryńyzǵa myqty densaýlyq, qajymas qaırat jáne beıbit ómir tileımin», dedi aýdan basshysy.
Adam ómirin qutqarýda kórsetken batyldyǵy úshin Serikjan Sembaıulyna aýdan ákimi Alǵyshatpen qosa, saltanatty túrde sońǵy nusqadaǵy iPad-ty tabys ete otyryp, mundaı batyl qadamǵa barǵan batyrlardyń is-áreketi men esimin el-jurty bile júrgeni jón ekenin erekshe atap ótti.
Almaty oblysy