Senat depýtaty Serik О́teshov Qaraǵandy oblysynyń turǵyndarymen kezdesti. Senator qalalardaǵy keıbir áleýmettik mańyzdy nysandarda bolyp, jylýmen qamtamasyz etý jáne sapaly medısınalyq qyzmet kórsetý máselelerin turǵyndarmen birge talqylady.
Kezdesý barysynda óńirdiń 2023-2027 jyldarǵa arnalǵan áleýmettik-ekonomıkalyq damýynyń keshendi josparyn iske asyrý, Balqashta týrıstik klaster qurý jáne Prıozersk qalasynda týrıstik ınfraqurylymdy damytý máseleleri talqylandy. S.О́teshov Balqash qalasynda kól jaǵalaýynyń qurylysyn kórdi jáne medısına qyzmetkerlerine arnalǵan kóppáterli úıdi jańǵyrtý jumysyna kýá boldy, sondaı-aq aýrýhana qalashyǵyn aralady. Depýtat sondaı-aq Prıozersk qalasynda sapaly jylýmen jabdyqtaýdyń mańyzdylyǵyna nazar aýdardy.
«Prıozersk qalasynyń halqy men kásiporyndaryn ortalyqtandyrylǵan jylýmen senimdi túrde úzdiksiz qamtamasyz etý úshin zamanaýı talaptarǵa jaýap beretin jabdyqtar men tehnologııalardy paıdalanatyn jańa jylý kózi týraly máseleni qarastyrý qajet», dep atap ótti S.О́teshov.
Senator sonymen qatar Aqtoǵaı, Buqar jyraý, Qarqaraly jáne Shet aýdandarynda bolǵan kezde Parlamentte aǵymdaǵy jyly qabyldaǵan zańdar týraly aýyl turǵyndaryn habardar etti. Al depýtattyń medısına qyzmetkerlerimen kezdesýinde onkologııalyq aýrýlardyń kóbeıýine baılanysty Qarqaraly aýdanynyń aýmaǵynda oblystyq pallıatıvtik ortalyq qurý máselesi talqylandy.