Shekara shebi bos qaldy dep az jazbadyq. Aıtty-aıtpady, shalǵaıdaǵy aýyldar qańyrap qalǵany qaı-qaısymyzdyń da janymyzǵa batqan. Kúni keshe Prezıdent Qasym-Jomart Toqaevtyń nazary Shyǵysqa aýyp, birqatar aýdannyń shekarasy qaıta bekitilip, birqatary aýdan mártebesin aldy. Sonyń biri Marqakól óńirindegi aýyldarǵa qaıta kósh quıylyp, eldiń etek-jeńi jıylyp jatyr.
Shyǵys Qazaqstan oblystyq máslıhatynyń kezekten tys XIV sessııasynda jańa qurylǵan aýdandardy damytýǵa qosymsha qarjy bólinetini sóz boldy. Qarjy eselenip, el irgesi bútindelip jatsa, Marqakól erteń-aq irgeli aýdanǵa aınalady.
Esterińizde shyǵar, kóktem týa Ońtústikten otyzǵa jýyq turǵyn Shyǵys Qazaqstan oblysyna arnaıy kelip, el-jerdiń jaı-kúıimen tanysqan. Solardyń ishinde Marqakólge bes otbasy moıyn buryp, Aqbulaq aýlyna kóship keldi. Olardyń ornalasýyna jergilikti ákimdik qajetti kómek qoldaryn sozdy.
– Marqakól aýdanyn aralap, aýyldardy kórip qaıtqan edik. Sóıtip, Aqbulaq aýly unady, mamandyǵyma saı jumys tabyldy. Otbasymyzben aqyldasyp, kóship keldik. Bes balam bar, úsheýi mektepte oqysa, bireýi balabaqshaǵa barady. Endi bireýi kolledjge oqýǵa tapsyrdy. О́zim – hımııa jáne bıologııa pániniń muǵalimimin, – deıdi qonys aýdarǵan Mereke Kerimbekqyzy.
Bul joly kóshpen ilese jer shalýǵa kelgen ońtústiktiń turǵyndaryna uıymdastyrýshylar Marqakól óńirin aralatyp, shekara shebindegi aýyldardy taǵy tanystyrdy.
– Jyl basynda Shymkent, Túrkistan qalalaryna arnaıy jumys saparymen baryp, Shyǵys óńirine kóshýge nıet bildirgen otyzǵa jýyq adamdarmen áńgimeleskenbiz. Olar mamyrda arnaıy kelip, Marqakól aýdanyn aralap qaıtqan. Nátıjesinde, bes otbasy kóship kelse, taǵy birnesheýi jer kórip qaıtýǵa bekingen. Ońtústikten turǵyndardy kóshirip ákelý jumysyn jalǵastyramyz. Jalpy, óńirimizge kóship kelýshilerge memleket tarapynan kómek kórsetiledi, – deıdi oblystyq Eńbek mobıldigi ortalyǵynyń dırektory Ásel Qaıyrbekova.
Aıta keteıik, Shyǵys Qazaqstan oblysyndaǵy birqatar aýdanǵa arnaıy kvota bólingen. Qonys aýdarýǵa beriletin birrettik sýbsıdııa bıyl 70 aılyq eseptik kórsetkishke teńeldi. Demek 258 440 teńge. Bul – otbasyndaǵy árbir adamǵa beriletin tólem. Al ekonomıkalyq utqyrlyq sertıfıkaty turǵyn úı qunynyń 50 paıyzyn óteıdi. Bul sertıfıkat quny 4 282 720 teńgeden aspaıtyn baspana alýǵa beriledi.
– Jańadan qurylǵan Marqakól aýdanynda adam sanyn kóbeıtý kerek. О́zim týǵan aýylym Aqbulaqqa byltyr da birneshe otbasynyń kóship kelýine septigimdi tıgizgenmin. Bıyl da bılik ókilderimen birge ońtústiktiń turǵyndaryn shyǵysqa kóshirýge atsalysyp júrmin. Kóship kelgen turǵyndardy qarsy alyp, úıge qajetti zattaryn alyp berdik, – deıdi Aqbulaq aýlynyń týmasy, kásipker Baýyrjan Jaýǵasharov.
Joǵaryda atap ótkendeı, Shyǵys Qazaqstan oblystyq máslıhatynyń kezekten tys XIV sessııasynda oblystyq bıýdjet talqylanǵan. Ekonomıka jáne bıýdjettik josparlaý basqarmasynyń basshysy Farhad Belbeevtiń málimetinshe, 2024 jylǵa arnalǵan oblystyq bıýdjetti jańa qurylǵan aýdandar arasynda qaıta bólý negiz bolǵan. Katonqaraǵaı jáne Kúrshim aýdandarynyń bıýdjetterinen 2 992,5 mln teńge berý kózdelgen. Atalǵan qarajat Úlken Naryn jáne Marqakól aýdandaryn da damytýǵa jumsalady. Sonymen qatar osy aýdandardaǵy memlekettik organdardyń materıaldyq-tehnıkalyq bazasyn nyǵaıtýǵa 2 mlrd teńge qarastyrylǵan.
Jumys turalap turǵan joq. Máseleler ret-retimen sheshimin taýyp keledi. Eń bastysy, ońtústikten túzilgen kósh legi arta bersin. Marqakóldikterdiń de tilegi – osy.
Shyǵys Qazaqstan oblysy,Marqakól aýdany