Elordadaǵy Beıbitshilik jáne kelisim saraıynda Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov BUU-nyń Beıbit jınalystar jáne assosıasııalar quqyǵy máseleleri jónindegi Arnaıy baıandamashysy Maına Kıaımen kezdesti.
Kezdesýge, sondaı-aq, Qazaqstan Parlamenti Májilisiniń depýtattary Egor Kappel men Iýrıı Tımoshenko, Qazaqstan Prezıdenti janyndaǵy «Qoǵamdyq kelisim» RMM-niń dırektory Natalıa Kalashnıkova, Ortalyq Azııa aımaǵyndaǵy etnosaralyq jáne konfessııaaralyq qatynastardy zertteý ortalyǵynyń meńgerýshisi Aıgúl Sádýaqasova qatysty.
Basqosý barysynda BUU-nyń arnaıy baıandamashysyna etnosaralyq toleranttylyq pen qoǵamdyq kelisimniń qazaqstandyq modeli tanystyryldy. Eraly Toǵjanov óz sózinde Maına Kıaıge QHA-nyń qurylý tarıhy, konstıtýsııalyq mártebesi, onyń mindetteri men etnosaralyq toleranttylyq pen qoǵamdyq kelisimdi nyǵaıtý boıynsha atqaryp otyrǵan jumystary, QHA atynan saılanǵan depýtattardyń qyzmetteri, Assambleıanyń halyqaralyq yntymaqtastyqtaǵy róli týrasynda jan-jaqty aıtyp berdi.
«QHA 1995 jyly quryldy. Onyń Tóraǵasy – Memleket basshysy Nursultan Nazarbaev. Onyń 3 orynbasary bar. Assambleıanyń quramyna elimizde turatyn barlyq etnostyq toptar kiredi. Olar – 130-dan astam etnos pen 17 konfessııanyń ókilderi. Assambleıa – konstıtýsııalyq organ. Onyń barlyq sheshimderin barlyq memlekettik organdar mindetti túrde qabyldaýy tıis. Al, negizinen, eń joǵary sheshim Prezıdent qatysatyn Assambleıa sessııalarynda qabyldanady. Buǵan qosa, QHA-nyń árdaıym turaqty túrde qyzmet etetin keńesi bar. Onyń qabyldaǵan sheshimderi de mańyzdy. Qazaqstannyń qoǵamdyq kelisim modeli BUU-da Bas hatshy Pan Gı Mýnnyń qatysýymen tanystyryldy. Budan buryn Pan Gı Mýn elimizge jasaǵan sapary barysynda Qazaqstan halqy Assambleıasynyń jumysymen keńinen tanysyp, Assambleıanyń qaǵıdattary BUU-nyń qaǵıdattaryna tolyǵymen saı keletini jóninde málimdegen edi», dedi óz sózinde E.Toǵjanov.
Sondaı-aq, ol búginde barlyq etnostyq toptardyń ókilderi biryńǵaı jáne teń azamattyq-quqyqtyq jáne qoǵamdyq mártebege ıe ekendigin jetkizdi. «Qazirgi tańda Qazaqstanda 800-den astam etnomádenı birlestik jumys isteıdi. Olar ótken jyly 11 myńnan astam is-shara ótkizdi. Jalpy alǵanda, Qazaqstandaǵy etnostyq toptardyń quqyqtary tolyqtaı qamtamasyz etilgen», dedi bul oraıda Assambleıanyń Hatshylyq meńgerýshisi.
Maına Kıaı óz kezeginde adam quqyqtary jónindegi máseleler árdaıym óziniń tikeleı ókilettiligine jatatyndyqtan, nazarda turatynyn jetkizdi. Sondaı-aq, ol Qazaqstandaǵy etnomádenı birlestikterdiń qaı kezde jáne qalaı qurylǵanyna, olardyń aldynda turǵan mindetterine, QHA atynan saılanatyn depýtattardy kim anyqtaıtyny jóninde ózin qyzyqtyrǵan saýaldaryn qoıdy.
Láıla EDILQYZY,
«Egemen Qazaqstan».