Senat depýtaty Qaırat Tastekeev Abaı oblysyna jumys sapary barysynda sot jáne prokýratýra qyzmetkerlerimen kezdesýler ótkizdi. Júzdesý barysynda Parlament Senatynyń jumysy týraly habardar etti jáne «Qazaqstan Respýblıkasynyń sot júıesi men sýdıalarynyń mártebesi týraly» Konstıtýsııalyq Zańyna jaqynda qabyldanǵan negizgi ózgeristerge toqtaldy.
Q.Tastekeev qabyldanǵan zańnyń maqsaty sot júıesin odan ári jetildirý, sýdıalardyń táýelsizdigin kúsheıtý, olardyń teń mártebesin qamtamasyz etý, ákimshilik qysymdy joıý, olardy saılaý tetikterin jetildirý, sondaı-aq Joǵary Sot Keńesiniń róli men mártebesin kúsheıtý ekenin atap ótti.
«Biz Qazaqstan Respýblıkasynyń sot júıesindegi eń bıik standarttarǵa saı bolýyna umtylamyz. Qabyldanǵan zań sýdıalardyń táýelsizdigi men teńdigin qamtamasyz etýge, sondaı-aq Joǵary Sot Keńesiniń rólin nyǵaıtý arqyly sol maqsatqa jetýge baǵyttalǵan», dedi senator.
Depýtat sonymen qatar Senat ótken jyly júzden astam zańdy maquldaǵany týraly qatysýshylarǵa aıtyp, Konstıtýsııada kózdelgen jaǵdaılarda Úkimet músheleriniń Parlament Palatalaryna esep berýiniń mańyzdylyǵyn atap ótti. Senator sot pen prokýratýra qyzmetkerleriniń el ómirindegi erekshe róline toqtala kelip, olardyń jumysy qoǵamdaǵy quqyqtyq tártip pen ádilettilikti qamtamasyz etýde sheshýshi ról atqaratynyn jetkizdi.