Almaty qalalyq máslıhaty qoǵamdyq kólikte jol júrý tarıfiniń baǵasyn kóterý usynysyn maquldady, dep jazady Egemen.kz.
Endi almatylyqtar jol aqysy úshin 120 teńge tóleıdi. Sonymen qatar avtobýstarda qolma-qol tólem jasaýdy alyp tastaý josparlanyp otyr.
Almaty qalalyq mobıldilik basqarmasynyń basshysy Saǵyndyq Telibaev 2023 jylǵy tamyzda jol júrý tarıfi 11 jylda alǵash ret 100 teńgege deıin kóterilgenin eske salyp, bul baǵa avtobýstardy jóndeý syndy shyǵyndy ótemeıtinin aıtty.
«Tasymaldaýshylardyń naqty shyǵyny 310 teńgeden asady, keıbir marshrýtta 400 teńgeden asady. Osyǵan baılanysty ákimdik áleýmettik mańyzy bar baǵyttardy sýbsıdııalaıdy. Qabyldanǵan sharalar 2024 jyly sýbsıdııalar somasyn 7 mıllıard teńgege deıin tómendetýge múmkindik beredi, sonymen qatar qala turǵyndaryn sapaly, qaýipsiz jáne jaıly qoǵamdyq kólik qyzmetimen qamtamasyz etýge oń áser etedi», dedi Saǵyndyq Telibaev.
Aıta keteıik, qazir Almatyda 22 jeke, 1 kommýnaldyq avtobýs parki jolaýshylardy tasymaldaýmen aınalysady. Al qoǵamdyq kólikpen qatynaıtyndar sany 1,5 mln adamnan asady.