Almaty oblysynda apta basynan beri burshaq aralasqan jańbyr tolassyz jaýyp, birqatar aımaqtarda aǵyn sýlar paıda boldy.
Shildeniń 16-sy kúni Kegen aýdanynyń Aqsaı aýylynyń mańyndaǵy taýly aımaqta jaýyn-shashynnyń mol túsýinen jazyqty túgel sý basty. Aǵyny kúshti sýdan jol boıyndaǵy 2 júk kóligi jol jıegine shyǵyp ketken. Tótenshe oqıǵa ornyna Kegen, Eńbekshiqazaq jáne Uıǵyr aýdandarynan arnaıy tehnıkalar tartylyp, joldyń laı sý basqan tustaryn tazartyp, kólik qozǵalysyn qalypqa keltirý jumystaryn júrgizdi.
Oqıǵa ornyna TJD, PD, ákimdik ókilderi men «QazAvtoJol» mekemesinen 17 qyzmetker jedel túrde jumyldyryldy. Tús aýa tolassyz jaýǵan jańbyr toqtap, sý deńgeıi tómendedi.
Sondaı-aq osy kúni Jambyl aýdanynyń Beriktas aýylynda da tolassyz jaýǵan jańbyr saldarynan kólbeý sý aǵyny paıda bolyp, 15 aýla aýmaǵy men 3 turǵyn úıdi sý basty. Osyǵan baılanysty TJD bólimsheleri men jergilikti atqarýshy organdar ınertti materıaldar salynǵan 2 myń qapshyq daıyndady. Sonymen qatar sý basqan aýmaqtan sýdy sorý jáne laıdan tazartý jumystaryn júrgizip, oryn alǵan oqıǵaǵa monıtorıng jasalǵany týraly TJD-niń baspasóz qyzmeti habardar etti.
Bul jumystarǵa TJD, jergilikti atqarýshy organdardyń, TJM 28237 áskerı bóliminiń jeke quramynan 100-den astam adam, 11 motopompa men 16 birlik tehnıka jumyldyrylǵan.
Almaty oblystyq TJD turǵyndarǵa jaýyn-shashyn mol túsip jatqan taýly óńirlerde saqtyq sharalaryn saqtaýdy jáne aýa raıy boljamyna nazar aýdarýdy eskertedi.
Almaty oblysy