Májilis Tóraǵasynyń orynbasary Darıǵa Nazarbaeva GFR-dyń Qazaqstandaǵy Tótenshe jáne ókiletti elshisi Gıdo Herspen kezdesti. Elshimen áńgime barysynda Májilistiń parlamenttik delegasııasynyń jaqyn ýaqytta Germanııaǵa jasaıtyn sapary jaıy talqylandy, dep habarlady osy palatanyń baspasóz qyzmeti.
Sapar maqsaty – Germanııa Federaldyq kansleri Angela Merkelge Qazaqstan Prezıdenti Nursultan Nazarbaevtyń 2017-2018 jyldary BUU Qaýipsizdik Keńesiniń turaqty emes músheligine Qazaqstannyń kandıdatýrasyn ilgeriletýge qatysty joldaýyn tabys etý.
Vıse-spıker aldaǵy sapardyń mańyzdylyǵyna nazar aýdara kelip, Germanııa men Qazaqstannyń jaqyn ári senimdi áriptester ekenin atap ótti.
Bizdiń elderimizdiń ekijaqty qarym-qatynasy turaqty saıası únqatysý, saýda-ekonomıkalyq, mádenı-gýmanıtarlyq baılanystardy júıeli keńeıtý jolynda damyp keledi. BUU, EQYU jáne basqa da uıymdar sheńberinde ózara is-qımyldy odan ári nyǵaıtý jaıy da nazardan tys qalǵan emes, deı kele Darıǵa Nazarbaeva:
– Ǵalamdyq qaýipsizdik máselelerinde, áriptestik, dostyq qatynasta, áleýmettik, ekonomıkalyq jáne mádenı salalardaǵy ózara is-qımyldy damytýda bizdiń elderimizdiń kózqarasy ortaq. Olardyń barlyǵyn Germanııaǵa saparymyz barysynda jáne delegasııa baǵdarlamasynda belgilengen kezdesýler kezinde talqylaıtyn bolamyz, – dedi.
О́z kezeginde elshi Germanııanyń Qazaqstannyń mańyzdy halyqaralyq bastamalaryn qoldaıtynyn jáne bizdiń elimizben yqpaldastyqty odan ári damytýǵa múddeli ekendigin alǵa tartty.
Kezdesý ıeleri áriptestik basymdyqty sóz etip, eki el arasyndaǵy baılanysty, sonyń ishinde, parlamentaralyq dıplomatııany jańa beleske kóterý qajettiligin atap ótti.
Kezdesýge Májilistiń Halyqaralyq ister, qorǵanys jáne qaýipsizdik komıtetiniń hatshysy Vıktor Rogalev qatysty.