Senat depýtaty Sultanbek Mákejanov Almaty oblysy Esik qalasyndaǵy qazirgi zamanǵy mektep qurylysymen tanysty. 900 oqýshyǵa arnalǵan bilim ordasy – ótken jylǵy Aqmola oblysyndaǵy Qosshy qalasynda ashylǵan mektepten keıingi zamanaýı úlgide salynyp jatqan ekinshi bilim berý mekemesi.
«Almaty qalasynda da osyndaı mektep salý josparlanyp otyr. Osyǵan baılanysty biz búgin tájirıbe almasý úshin Almaty qalasy qurylys basqarmasynyń basshysy men jobalaý ınstıtýtynyń basshylaryn da osy nysanǵa shaqyrdyq. Mundaı mektepterdegi synyptardyń aýdany 60-62 sharshy metrdi quraıdy, bul balalardyń bilim berý úderisine qolaıly jaǵdaı týǵyzady. Bolashaqta qazaqstandyq mektepter osyndaı bolýy tıis. Sport alańdary da osy standarttarǵa saı bolýy kerek», dedi senator.
Depýtat sapar barysynda Almaty qalasyndaǵy jol keptelisi máselesine de nazar aýdardy. Ol qalanyń eń kóp júretin ýchaskeleriniń biri Qulja traktisindegi joldy keńeıtý barysymen tanysty. Depýtatqa joldy keńeıtip, jolaqtar sanyn kóbeıtý jumystary bıyl 1 qyrkúıekke deıin aıaqtalatyny týraly habarlandy. Qulja traktinde osyǵan deıin 4 jolaq bolsa, endi ár baǵytta 3-ke deıin kóbeıtiledi jáne jalpy alǵanda 6 jolaqqa keńeıtiletin bolady. Bul qalanyń shyǵysyndaǵy keptelisti edáýir azaıtady.