«Jańa dala-Green day-2024» mamandyrylǵan kórmesinde álemniń 20 elinen kelgen 200-den astam kompanııa 600-ge jýyq jańa tehnıka men tehnologııasyn jurt nazaryna usyndy. Sharaǵa qatysqan Aýyl sharýashylyǵy mınıstri Aıdarbek Saparov etti jáne sútti asyl tuqymdy maldardy, alańǵa qoıylǵan 600-ge jýyq aýyl sharýashylyǵy tehnıkasy men qural-jabdyqty aralap kórdi. Sondaı-aq túrli daqyl paıdalanylǵan tájirıbelik egistiń nátıjelerin salystyrdy.
Agroóndiris ınvestoryn memleket qoldaıdy
Halyqaralyq is-sharanyń basty maqsaty – aýyl sharýashylyǵy ǵylymynyń jetistikterin paıdalanyp, agroónerkásip keshenine zamanaýı tehnologııalardy engizýdi jedeldetý, oǵan qosa salany sıfrlandyra otyryp, damýdyń jańa bıigine kóterilý.
«Memleket basshysy aýyl sharýashylyǵy ónimi kólemin 5 jylda 2 ese arttyrý jóninde Úkimetke tapsyrma berdi. Bul agroónerkásiptik keshenge zamanaýı agrotehnologııalardy jedel engizýdi, agrarlyq ǵylym jetistikterin paıdalanýdy, joǵary ónimdi tehnıka men sıfrlyq tehnologııany qoldanýdy talap etedi. Kórme óndiris tıimdiligin arttyrýǵa arnalǵan qajetti quraldar men sheshimderdi bir jerde kórýge múmkindik beretin úlken demonstrasııalyq alań», dedi mınıstr.
Kórmede óziniń servısi men taýaryn usynyp jáne tájirıbe almasyp, shúıirkelesken myńdaǵan sharýa adamyn kórdik. Is-sharanyń iskerlik baǵdarlamasynyń aýqymdy bolýy salanyń jetilgenin, sharýalardyń jańa tehnologııalar men zamanaýı sheshimderge degen qyzyǵýshylyǵyn ańǵartady. Aýyl sharýashylyǵy salasynyń jumysyna belsene aralasyp, sońǵy úlgidegi tehnologııa men tehnıkasyn, sony ázirlemelerin usynǵan Fransııa, AQSh jáne Germanııa elshilikteri sharanyń salmaǵy men mazmunyn arttyra tústi.
«Elimizdi eksportqa arnalǵan taýarlar men qyzmetterdi óndirý alańy retinde qarastyrýǵa daıyn árbir ınvestorǵa esigimiz ashyq, qurmetimiz zor. О́ıtkeni saladaǵy óndiristi ulǵaıtyp, paıdaly eksport jasaýǵa elimizde tolyq múmkindik bar. Eýrazııa kindiginde ornalasqan eldiń aýyl sharýashylyǵy jeriniń aýdany 200 mln gektardan asady. Onyń 25 mıllıony – egistik, qalǵan 180 mıllıony – mal jaıylymy. Bul aýyl sharýashylyǵy óndirisin keńeıtýge orasan zor múmkindik beredi», dedi A.Saparov.
Onyń sózinshe, ósimdik pen mal sharýashylyǵyndaǵy barlyq tehnologııalyq úderis iske asyrylatyn ınvestısııalyq jobanyń 25%-dan 50%-ǵa deıingi tólemi memleket tarapynan óteledi. Jeńildetilgen nesıe men lızıng uzaq jáne orta merzimge beriledi. Aýyl sharýashylyǵy salasy úshin arnaıy salyq rejimi bar. Otandyq jáne sheteldik ınvestorlarǵa jan-jaqty qoldaý kórsetiledi.
Kóp fermerdiń jolyn ashqan shara
«QazAgroQarjy» AQ kórme pavılonynda aýyl sharýashylyǵynyń taýar óndirýshileri úshin «Ashyq esik kúnin» ótkizdi. Onda barlyq óńirden kelgen fermerler men sala mamandary aksıonerlik qoǵam basshylaryna tolǵaqty suraǵyn qoıyp, túıindi máseleniń sheshimin izdedi. «QazAgroQarjy» basshylyǵy maýsym aıynda iske qosylǵan jańa jeńildetilgen baǵdarlama týraly aqparat berdi.
«Búgin árbir tutynýshynyń qajettiligi men jaǵdaıyn jaqsy túsiný maqsatynda «Ashyq esik kúnin» ótkizýdi jón kórdik. Bul amal klıentterimizdi mazalap júrgen másele men suranysyn jáne kompanııanyń osal tustaryn anyqtaýǵa kómektesedi. Qazir keńes alýǵa Aqmola, Qaraǵandy, Soltústik Qazaqstan men Pavlodar oblystarynyń fermerleri kelip otyr. Jumystyń basynda júrgen azamattarǵa salanyń kemshiligi aıqyn kórinedi. Alystan kelgen fermerdiń arqasynda aýyl sharýashylyǵy salasynda neni jaqsartyp, neni qosý keregin anyq bilip aldyq. Pikirler men usynystardy tyńdap, ony tez arada sheshýge atsalystyq», dedi «QazAgroQarjy» AQ basqarma tóraǵasy Aıdar Prashev.
Taıaýda kompanııa «Báıterek» holdınginiń qoldaýymen aýyl sharýashylyǵy sýbektilerin qoldaý maqsatynda 100 mlrd teńge somasyna jyldyq 5%-dyq jeńildetilgen lızıng baǵdarlamasyn iske qosty. Lızıng 7 jyl merzimge beriledi jáne 10% avanstyq tólem 1 jeltoqsanǵa deıin keıinge shegerilgen. Sonymen qatar eshqandaı kepildik talap etilmeıdi. Bul – fermerlerge tehnıka parkin jańartýǵa jáne óndiris tıimdiligin arttyrýǵa tamasha múmkindik.