Taıaýda oblys ortalyǵyndaǵy ádebıet jáne óner mýzeıindegi jádigerlerdi tamashalap júrip bul kúnde kezdese bermeıtin «Zınger» tigin mashınasyna kózimiz tústi.
Surastyryp bilsek, Arqanyń ardageri Aqan seri ǵashyq bolǵan Aqtoqty Baqtybaıqyzynyń is tikken tigin mashınasy eken. Bizdiń bilýimizde «Zınger» tigin mashınasyn nemistiń osy attas kompanııasy shyǵarǵan. Aqan seri men Aqtoqtynyń zamanynda qııandaǵy Kókshege qolǵa túse bermeıtin zat qalaı keldi eken? Ol zamannyń adamdary da órkenıet kóshine ilese bilgen-aý. Ári osyndaı tigin mashınasymen kóz jaýyn alatyn kórkem dúnıeler tikken arýdyń sheberligi qandaı boldy eken dep qııalǵa berilesiń.
El ishinde saqtalyp qalǵan esti estelikterdi kóńil súzgisine salsańyz, Alashtyń arý qyzdary ádemiligimen ǵana emes, ismerligimen de erekshelenetinin ańǵarar edińiz. Qazaqstannyń halyq jazýshysy Sáken seri Júnisovtiń «Aqan seri» romanynda da Aqtoqty beınesi birshama bederli baıandalǵan. Al tigin mashınasymen is tikkendigi týraly bile bermeıdi ekenbiz. Jádigerdi zamanynda osy mýzeıde ǵylymı qyzmetker bolyp jumys istegen ánshi-kompozıtor, qalamy qarymdy jýrnalıst Kárim Ilııastegi Zerendi aýdanyndaǵy Qyzylaǵash aýlynda turatyn Jalmuhannyń urpaqtarynan qalap alyp tapsyrypty. Jalmuhan urpaqtary ózderi úshin aıryqsha qundy sanalatyn tigin mashınasyn op-ońaı bere qoımaǵanǵa uqsaıdy. Ájemizden qalǵan kóz dese kerek. Sonysymen qymbat. Biraq sózge sheshen, adammen til tabysa biletin Kárim aǵa el ıgiligine jarasyn, rýhanı qazynaǵa qosylǵan bir tamshy olja bolsyn dep ákelgenge uqsaıdy.
Aqtoqtydaı arý qoldanǵan tigin mashınasy sol qalpy saqtalypty. Búginde mýzeı tórinde jalǵyz Aqtoqtynyń ǵana emes, ilki zamandaǵy Alashtyń aı nurly, arý sıpatty bar qyzynyń bolmys-bitimin baıandap tur.
KО́KShETAÝ