Qazaqstan Respýblıkasynyń Memlekettik hatshysy, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqovanyń jetekshiligimen selektorlyq keńes ótti, dep habarlady Prezıdenttiń baspasóz qyzmeti.
Keńeske Astana, Almaty qalalary men oblystar ákimderiniń orynbasarlary – ákimder janyndaǵy áıelder isteri jáne otbasylyq-demografııalyq saıasat jónindegi komıssııalardyń tóraǵalary qatysty. Onyń barysynda Memleket basshysynyń «Nurly Jol – bolashaqqa bastar jol» atty Joldaýynyń negizgi erejelerin iske asyrýǵa arnalǵan Áıelder isteri jáne otbasylyq-demografııalyq saıasat jónindegi ulttyq komıssııanyń 2015 jylǵy jumysynyń negizgi baǵyttary belgilendi.
G.Ábdiqalyqova Ulttyq komıssııanyń bıylǵy jumysynda óńirlik damýǵa basa mán beriletinin atap ótti. Memlekettik hatshy keńeske qatysýshylardyń nazaryn áıelderdi jumyspen qamtý, bıznestiń áleýmettik jaýapkershiligin arttyrý, áıelder kásipkerligine qoldaý kórsetý máselelerine aýdardy. G.Ábdiqalyqova: «Eńbekke qabiletti jáne jumys isteýge múmkindigi bar birde-bir áıel jumyssyz qalmaýy tıis!» – dedi.
Qazaqstan halqy Assambleıasy jylynda otbasyn nyǵaıtý jumysy Ulttyq komıssııanyń negizgi mindetteriniń birine aınalýǵa tıis. Bul oraıda, neke jáne otbasy ınstıtýtyn nyǵaıtýdyń, otbasylyq qundylyqtardy dáripteý men saqtaýdyń aıqyn dáleli bolyp tabylatyn «Mereıli otbasy» ulttyq konkýrsy mańyzdy ról atqarady. Memlekettik hatshy: «Otbasyn nyǵaıtý – qoǵamdaǵy turaqtylyqtyń, ıaǵnı eldegi tatýlyq pen kelisimniń kepili!» – dep atap ótti.
Memlekettik hatshy óńirler ákimderiniń orynbasarlaryna Jeńistiń 70 jyldyǵyn merekeleý aıasynda Prezıdenttiń Uly Otan soǵysynyń ardagerlerine qoldaý kórsetý jónindegi bastamalaryn iske asyrýdy qamtamasyz etýdi tapsyra otyryp, áıelder arasynan shyqqan soǵys ardagerleriniń, maıdangerler áıelderiniń, tyldaǵy eńbekshi áıelderdiń sińirgen eńbekterine toqtalyp ótti.
Selektorlyq keńes qorytyndysy boıynsha Memlekettik hatshy birqatar naqty tapsyrmalar berdi.