Taıaýda Venada Qazaqstannyń Avstrııadaǵy Elshiligi osy el ónerkásipshiler birlestiginiń qoldaýymen «Discovering business opportunities in Kazakhstan» atty Qazaqstan-Avstrııa bıznes-forýmyn ótkizdi. Qazaqstan ınvestısııalary arasyndaǵy salynǵan jáne qazaq-avstrııa ekonomıkalyq yntymaqtastyǵynyń jarqyn úlgisi retinde Rıts-Karlton qonaq úıi forým ótkizý orny retinde tańdaldy.
Bıznes-forým jumysyna 100-ge jýyq avstrııalyq kompanııa, úkimet jáne bıznes-birlestikteri ókilderi qatysty. Qurmetti qonaqtar ishinen Avstrııa Parlamentiniń depýtattar tobyn basqarǵan Ulttyq keńestiń ekinshi prezıdenti Karl-Haıns Kopf, Kólik, ınnovasııalar men tehnologııalar vıse-mınıstri Andreas Raıhard jáne basqa da joǵary laýazymdylar qatysty. Forýmnyń negizgi baıandaýshysy retinde sóz sóılegen Investısııalar jáne damý vıse-mınıstri Erlan Saǵadıev forým qatysýshylaryn «100 naqty qadam» atty Ulttyq jospar, 2015-2018 jyldarǵa arnalǵan ındýstrııalyq-ınnovasııalyq damý memlekettik baǵdarlamasy, 2015-2017 jyldarǵa arnalǵan «Nurly Jol» baǵdarlamasy, ınvestorlardy qoldaý sharalary jáne óndiristi lokalızasııalaý aıasyndaǵy yntymaqtastyq múmkindikteri týraly aqparattandyrdy. Bıznes-forým sheńberinde ótken paneldik pikirsaıys barysynda Qazaqstan Parlamenti Májilisiniń depýtaty – Qazaqstan Mashına jasaýshylar odaǵynyń basqarma tóraǵasy M.Pishembaev, Avstrııanyń Ekonomıka palatasynyń vıse-prezıdenti R.Shens jáne «KazneksInvest» AQ tóraǵasynyń orynbasary A. Erǵazıeva ınteraktıvti formatta Qazaqstanda bıznes jasaý múmkindikteri jáne ınvestısııalyq ahýal jaıly aıtyp berdi. Vıse-mınıstr E. Saǵadıev Avstrııanyń ekonomıka vıse-mınıstri B. Gırlıngermen kezdesip, taraptar eki-jaqty árekettesýdi odan ári kúsheıtýge jáne nyǵaıtýǵa múddeliligin rastady. Forým sheńberinde «KazneksInvest» AQ pen «KapschTrafficCom» transulttyq kompanııasy arasynda yntymaqtastyq týraly memorandýmǵa qol qoıyldy. Bul kompanııa Qazaqstanda jol salasyn damytýǵa qatysýdy josparlaıdy. Odan basqa ónerkásipshiler birlestiginiń ofısinde vıse-mınıstr E. Saǵadıev birqatar jetekshi avstrııalyq kompanııa basshylarymen kezdesýleri ótti. Jalpy, osy forým barysynda avstrııalyq kompanııalar Qazaqstanmen yntymaqtasýǵa úlken qyzyǵýshylyǵyn kórsetti. Áleýetti ınvestorlardan basqa, forým avstrııalyq kompanııalardyń elimizben ónerkásiptik kooperasııaǵa múddeliligin aıqyndady.
«Egemen-aqparat».
Sýret: inform.kz