ASTANA. 22 qańtar. Qyzylorda oblysy kásipkerler palatasynyń janyndaǵy kásipkerlerdiń quqyǵyn qorǵaý keńesi búginde kásipkerlerdiń qorǵaýshysyna aınaldy. Máselen, ótken jyly keńeste qaralǵan mańyzdy máselelerdiń nátıjesinde qyzylordalyq kásipkerlerdiń 450 mln.teńgesi óz «qaltalarynda» qaldy. Bul týraly oblystyq kásipkerler palatasynyń baspasóz qyzmeti habarlady.
Atap aıtqanda, óńirdegi «Keden Service» JShS keden organdarymen berilgen 350 mln.teńgege salyqtyq qaryzyn, ósimpulyn óteý týraly eskertýdiń zańdylyǵyna qatysty, sondaı-aq «Asar» jáne «Sarybulaq» JShS-teri «QazTransGazAımaq» AQ oblystyq fılıalynyń tabıǵı gazdy tutynǵany úshin usynǵan shotynyń zańdylyǵyna qatysty shaǵymdanyp kelgen bolatyn.
Bul máseleler keńes otyrysynda qaralyp, sonyń qorytyndysymen atalmysh kásipkerlerdiń múddesin qorǵaý jóninde sheshim qabyldandy.
Kásipkerler palatasy qyzmetkerleriniń atqarǵan jumysynyń nátıjesinde Qyzylorda oblysynyń mamandandyrylǵan ekonomıkalyq soty keden organymen usynylǵan 350 mln.teńgege qatysty eskertýdi keri qaıtarý, keden organynyń laýazymdy adamdaryna tártiptik shara kórý jóninde, ekinshi másele boıynsha usynylǵan shotty 78,3 jáne 96 paıyzǵa deıin azaıtý týraly sheshim shyǵardy.
Budan ózge, keńeste kásipkerlerdiń zańdy quqyǵyn shektegen «KREK» AQ-na qatysty másele de qaralyp, nátıjesinde energııamen jabdyqtaýshy mekemeniń kásipkerlerge qatysty talaptaryna oblystyq prokýratýramen narazylyq bildirilip, mekemeniń erejesindegi kásipkerlerdiń quqyǵyna shekteý qoıatyn tarmaqtaryna tıisti ózgerister engizildi.
Aıta ketý kerek, Qyzylorda oblysynyń kásipkerler palatasy janyndaǵy kásipkerlerdiń quqyǵyn qorǵaý keńesi 2014 jylǵy 22 qańtarda quryldy. Keńes quramynda kásipkerler men kásipkerlik qaýymdastyqtarynyń, BAQ-tyń ókilderi men zańgerler, sondaı-aq, quqyq qorǵaý organdarynyń qyzmetkerleri engizilgen.
Joldybaı Bazar.
Derek: Qyzylorda oblystyq kásipkerler palatasynyń baspasóz qyzmeti.
Sýret: strategy2050.kz.