PETROPAVL. 22 qańtar. «Azyq-túlik kelisimshart» korporasııasynyń Soltústik Qazaqstan oblystyq fılıaly belsheden qaryzǵa batqan dıqandardan bereshegin endi sot arqyly óndirip alýdy kózdep otyr. Bul týraly egemen.kz tilshisi habarlady.
Búgingi kúni bergen sert, aıtqan ýádeden aınyp otyrǵan boryshkerlerdiń qaryzy 264 mıllıon teńgeden asyp jyǵylady. Dıqandar jylqy jylynyń óte aýyr soqqanyn aıtqanymen, múddeli vedomostvonyń bul ýájdermen esh keliskisi joq. Aýa raıynyń kúrdeliligi eskerilip, bıdaıdy satyp alý baǵasy kóterilgenin, máselen, 3- surypty bıdaıdyń bir tonnasy 42 myń teńgeni quraǵanyn alǵa tartady.
«Aýyl sharýashylyǵy taýar óndirýshilerinen 9,5 mıllıard teńgege 265 myń tonna astyq satyp aldyq. Bular – úshinshi, tórtinshi, besinshi surypty bıdaı jáne arpa daqyldary. Qabyldaý jumystary jalǵasqanymen, óz mindetterinen jaltaryp júrgender joq emes. Soǵan qaramastan óńirdegi sharýa qojalyqtaryn qarjylandyrý baǵdarlamasyn júzege asyryp jatyrmyz. Atap aıtqanda, nesıege 37 myń tonna tuqym berýdi josparlap otyrmyz», deıdi «Azyq-túlik kelisimshart korporasııasy» UK» AQ Soltústik Qazaqstan oblysy boıynsha ókildiginiń dırektory Rýstam Janataev.
Onyń aıtýynsha, ótken jyly 1,5 mıllıard teńgege 100-den astam aýyl sharýashylyǵy taýar óndirýshileri qarjylandyrylypty. Jaǵdaılaryna qarap, nesıe merzimi uzartylypty. Endi onyń ýaqyty sozylyp ketse, sotqa júginýden basqa amal qalmaǵanǵa uqsaıdy.
Naýryzdan bastap «Azyq-túlik kelisimshart» korporasııasy kóktemgi, kúzgi dala jumystaryn atqarýǵa jeńildetilgen nesıe bere bastaıdy. Al qyrkúıek aıyna deıin un úgý kombınattaryna arzan baǵamen bıdaı jetkizip turý belgilengen.
Alaıda, Úkimet tarapynan jasalyp jatqan osyndaı qamqorlyqtardy paıdalanyp alyp, at-tondaryn ala qashyp júrgen boryshkerlerdiń bul áreketi esh aqtaýǵa jatpaıdy.
О́mir Esqalı.
Derek: egemen.kz.
Sýret: «QazAqparat».