Ánýardyń kásipker bolýyna tikeleı áser etken ákesi – Murat Uzaqbaıuly. Ol 80-jyldardyń orta tusynan zamannyń jeli basqasha soǵa bastaǵanyn jaqsy túsindi. Kelinshegi Gúlsim ekeýi Jezqazǵanda alǵashqylardyń biri bolyp kásipkerlikke bet burdy. Eski men jańanyń taıtalasyp turǵan shaǵy emes pe, kópshilik «kásipkerlik» degendi múldem túsinbeıtin. Biri kózine aıtyp, endi bireýleri syrtynan «Bular kapıtalıst bolǵaly júrgender» dep mysqyldap jatatyn.
Biraq Murat buǵan mán bermedi. Bir jertóleni jalǵa alyp, sol jerden shaǵyn azyq-túlik qoımasyn jasap aldy. Sol úshin qanshama qaǵaz jınady, kirmegen esigi qalmady. «Ruqsat alý» degen aspandaǵy aıdy qolǵa túsirýmen birdeı edi. Keıin memlekettiń tikeleı qamqorlyǵymen kásipkerlikke kóptegen jeńildik jasaldy. Al alǵashqy kezderde... «Endi bári retteldi» dep jumysqa kirise bastaǵanda, taýsylyp bolmaıtyn «tekserýshiler» birinen soń biri jetip kelip, ábden tıtyqtatyp jiberetin. Qazir sonyń bári kórgen tús tárizdi. Aıtýǵa ońaı, árıne. Saýda jasaý úshin azyq-túliktiń ózi de taptyra bermeıtin. Qolyna ilikkenin sál-pál ústeme qosyp, bazarǵa shyǵaryp satady. Keıde sonysy ózin-ózi aqtamaı da qalady. Biraq Murat buǵan esh qysylmaıtyn. «Búgin bermese, Qudaı erteń beredi» dep óz-ózin shydamdylyqqa shaqyryp, bardy qanaǵat tutatyn.
Ánýarbek eseıe kele ákesinen osyndaı áńgimelerdi estigende sener-senbesin bilmedi. Ol, árıne, ákesi kásipkerlikti aıaǵynan nyq turǵyzǵan kezde oń-solyn tanı bastady ǵoı. Tipti sol kezdiń ózinde de ákesiniń kúndiz-túni tynymsyz tirligin kórip ósti. «Ter tókpeseń isińde mán bolmaıdy» dep otyratyn áke sózi buǵan ómirlik ósıet ispetti bolyp, jadynda jattalyp qaldy.
Osydan bes jyl buryn ákesin máńgilik saparǵa atandyryp saldy. Kásipkerliktiń bar salmaǵy óziniń ıyǵyna túskenin túsindi. Áke isin alǵa jeteleý – mindet. О́ıtkeni naýqasy meńdep jatqanda ákesiniń «Balam, endigi sharýanyń bári ózińe qalatyn túri bar. Eńbektenýden sharshama, sosyn qolyńnan kelgeninshe qaıyrymdylyq jasaýdan qashqaqtama» degen eki sózin esinen shyǵarǵysy joq.
«Seniń ákeń kásipkerlikti bastaǵanda ári shopyr, ári júkshi, ári qurylysshy, ári satýshy bolyp júretin. Eńbekqorlyǵyna qaıran qalatynbyz. Saǵan Murattyń sol qasıetteri juqqan eken». Ákesiniń dostary munyń isterine súısinisin osylaısha bildirip jatady.
Ánýarbek Álseıitov ákesiniń kózi ispetti «Aqtoty» azyq-túlik dúkeniniń aıasyn keńeıtip, azyq-túlikti halyqqa neǵurlym qoljetimdi baǵamen usynyp keledi. Árıne, bul ózdiginen bola qalmaıdy, tynymsyz izdenis kerek. Mysaly, ol ónimderi elimizge keńinen tanymal «Sultan» kompanııasymen kelisimshartqa otyrdy. Kompanııanyń barlyq makaron ónimderin tikeleı alady, dúkeninde satady. Sondaı-aq kompanııanyń Ulytaý jerindegi dıstrıbıýteri retinde de qyzmet kórsetip keledi. Ulytaý oblysy qurylǵannan keıin «Ulytaý» áleýmettik kásipkerlik korporasııasy» AQ quryldy. Ánýarbek bul kompanııamen de birden birlesip jumys isteı bastady. Iаǵnı «Aqtoty» arqyly turaqtandyrý qorynyń ónimderin arzan baǵada halyqqa usynyp otyr. Jezqazǵan halqynyń «Aqtoty» dúkenin arzan dúkenderdiń biri retinde sanaıtyny sondyqtan bolsa kerek.
Á.Álseıitov – jaı ǵana kásipker emes, qoǵamdyq jumystarǵa da belsendilikpen atsalysa biletin azamattardyń biri. Ol – Jezqazǵan qalalyq máslıhatynyń depýtaty.
«Kásipkerlik – zaman aǵymy, ýaqyt talaby. Eń bastysy – halyqtyń qaltasyna aýyrlyq túsirmeıtin jol izdeý, minsiz qyzmet kórsetý. Depýtat retindegi mindetim de solaı. Bir-birine qaıshylyǵy joq», deıdi jas kásipker.
Jezqazǵan