ORAL. 26 sáýir. Batys Qazaqstan oblysynda Prezıdent saılaýy kúniniń ekinshi jartysynda elektoraldyq belsendilik deńgeıi artqany baıqaldy. Bul týraly egemen.kz tilshisi habarlady.
Aıtalyq, munda saǵat 14:00-de daýys berý tizimine tirkelgen 404 465 saılaýshynyń 67,13 paıyzy daýys bergen. Bul paıyzdyq kórsetkish saǵat 16:00 men 18:00-de tıisinshe 79,01 jáne 90,16-ny qurady. Al keshki saǵat 20:00-de, ıaǵnı, batysqazaqstandyq saılaýshylardyń daýys berý úderisteri qorytyndylanar kezde atalǵan kórsetkish 96,51 paıyzǵa jetti.
Daýys berý kezinde oǵan otandyq jáne sheteldik baıqaýshylardyń qalyń toby qatysty. Olardyń eleýli bóligin qazaqstandyq azamattyq alıans ókilderi quraıdy. Solardyń biri – «Abyroı» qoǵamdyq birlestigi janyndaǵy prezıdenttik saılaýdy baqylaý jónindegi shtabtyń úılestirýshisi Asqar Shaıǵumarov baıqaýshylardyń qyzmeti jóninde: «Prezıdent saılaýy kúni bizdiń táýelsiz baqylaýshylar toby Oral qalasyndaǵy 16 ýchaskede óz qyzmetterin atqardy. Sondaı-aq, ondaǵan eriktiler saılaý úderisterin baqylaýǵa múmkindik aldy. Bul, árıne, onsha kóp adam emes. Áıtse de, munyń ózi azamattyq alıans ókilderiniń basty elektoraldyq naýqanǵa beıjaı qaraı almaıtynyn kórsetedi. Mundaı azamattyq únqatý olardyń belsendi ustanym joldaryna bel sheshe kirise bastaǵanyn kórsetedi. Mundaǵy maqsat – bireý ǵana. Bul saılaý komıssııalarynan ádildik pen tazalyqty jáne zańdardyń saqtalýyn talap etý», – dedi.
Túıip aıtqanda, elimizdiń batystaǵy qaqpasy Oral óńirinde el erteńin aıqyndaıtyn eleýli kún – Prezıdent saılaýy joǵary azamattyq belsendilik pen órshil kóńil-kúı jáne jarqyn da shat-shadyman mereke jaǵdaıynda ótti. Buǵan keltirer mysaldar da jetkilikti. Máselen, dál búgin otbasyn qurǵan jas jubaılardyń daýys berý úshin qol ustasyp, óz tańdaýlaryn jasaý úshin saılaý ýchaskesine birge kelýi qandaı jarasymdy. Oral qalasyndaǵy №10 orta mekteptiń janynda ornalasqan №428 saılaý ýchaskesinde dál osyndaı kóriniske kýá boldyq. Olar 26 sáýir kúni neke kýálikterine ıe bolyp erli-zaıypty atanǵan Azamat jáne Ásel esimdi jas jubaılar.
Temir Qusaıyn.
Derek, sýret: egemen.kz.