Jetisýda medısına salasynyń jaı-kúıi – kóptiń nazarynda. Maman tapshylyǵy birtindep sheshilip keledi, zamanaýı apparattar da kezekte tur. Mine, jańa jedel-járdem kóligin suraǵan alystaǵy aýyldardyń da tilegi oryndaldy. Oblys ákimi Beıbit Isabaev óńirdegi 12 medısına uıymyna 29 sanıtarlyq avtokólik kiltin tabystady.
О́ńirde halyqqa sapaly medısınalyq kómek kórsetý úshin jyl saıyn aýqymdy jumys atqarylyp jatyr. Máselen, byltyr da dál osyndaı 29 jedel járdem kóligi mekemelerge berilgen edi. Alǵashqy medısınalyq kómektiń sapasyn arttyrýǵa qoldaý kórsetý jumysy júıeli atqarylady. О́ıtkeni halyqtyń densaýlyǵyn saqtaý, medısınalyq qyzmetti der kezinde kórsetýge jaǵdaı jasaý, onyń qoljetimdiligi men sapasyn arttyrý – basty mindettiń biri. Oblys basshysy aq jeleńdi abzal jandardyń jumysyna sáttilik tilep, kólik kiltin tabys etti.
«Densaýlyq saqtaý mınıstrligi, «Kazakhmys Holding» kompanııasy jáne oblystyq ákimdik ózara úsh jaqty memorandýmǵa qol qoıyp, oblys ortalyǵynda jańa zamanaýı onkologııalyq ortalyq salýǵa kelisim jasadyq. Bul is halyq ıgiligine arnalady. Biz shalǵaı aýyldarǵa dárigerlik qyzmetke kelgen árbir mamanǵa 10 mln teńge, qalalyq jerge kelgenderge 5 mln teńgeden bir rettik kótermeaqy beremiz. Alakól, Sarqan aýdandary men Taldyqorǵan qalasyna kelgen 5 maman kótermeaqy alyp, aýdan, qala halqyna qyzmet etip júr. Oblysta medısınalyq qyzmet kórsetý sapasyn odan ári jaqsartý úshin 67 jedel járdem brıgadasy jasaqtalǵanyn erekshe atap ótkenimiz jón. Olardyń ýaqtyly kelýin qamtamasyz etý úshin shalǵaı aýdandarda qosymsha ornalastyrýlar quryldy. Jańa apparattar naýqastardyń kelý ýaqytyn qysqartady. Bul degenimiz naýqasqa der kezinde kómek kórsetýdi bildiredi», dedi B.Isabaev.
Bıyl túrli zamanaýı medısınalyq jabdyq alýǵa jergilikti bıýdjetten 4 mlrd teńge qarastyrylǵan. Halyq ıgiligi úshin oblys aýmaǵynda 94 medısınalyq nysan iske qosylady degen jospar da joq emes. «Aýylda densaýlyq saqtaýdy jańǵyrtý» Ulttyq jobasy sheńberinde 59 nysan berilse, alǵashqy medısınalyq-sanıtarlyq kómek jelisin keńeıtý úshin aýyldyq jerlerde 27 blokti-modýldi nysan turǵyzylmaq.
«Olar qajetti qural-jabdyqtarmen jabdyqtalǵan jáne jedeldiktiń 4-sanatyndaǵy shaqyrýlarǵa qyzmet kórsetýge arnalǵan. Sondaı-aq medısına qyzmetkerlerine qoldaý kórsetý, qyzmettik baspanamen qamtamasyz etý jáne qolaıly eńbek jaǵdaıyn jasaý máselesi de shetinen sheshilip keledi. Osy qabyldanǵan sharalardyń barlyǵy halyqqa medısınalyq kómektiń sapasy men qoljetimdiligin arttyrýǵa múmkindik beredi. Materıaldyq bazany nyǵaıtý naýqastarǵa sapaly ári merzimdi medısınalyq qyzmet kórsetýdi odan ári jaqsartyp, sizderdiń óz mindetterińizge degen jaýapkershilikti arttyra túsedi dep senemin. Avtokólikterińiz qutty bolsyn», dedi oblys basshysy.
Odan keıin Kerbulaq aýdandyq aýrýhanasynyń bas dárigeri Qanatbek Ábdirahmanov aýdan halqynyń densaýlyǵy men turmysyn, ál-aýqatyn jaqsartý maqsatynda atqarylǵan sharalar úshin aýdan jurtshylyǵynyń atynan rızashylyǵyn bildirdi.
Jańa avtokólikter Aqsý, Alakól, Eskeldi, Kerbulaq, Kóksý, Panfılov, Sarqan, Qaratal aýdandyq ortalyq aýrýhanalaryna, sonyń ishinde aýyldyq medısınalyq mekemelerge, Taldyqorǵan qalalyq emhanasyna, Taldyqorǵan qalalyq kópsalaly aýrýhanasyna, oblystyq kópsalaly klınıka men oblystyq ftızıopýlmonologııalyq ortalyqqa berildi.
Aıta keteıik, oblystyq densaýlyq saqtaý basqarmasynyń málimetinshe, 2022 jyldan beri óńirde 40-tan asa nysan salynǵan. Bıyl densaýlyq saqtaý salasyna bólingen qarajat kólemi ótken jylmen salystyrǵanda ulǵaıyp, 92,3 mlrd teńgege jetip otyr. Soǵan sáıkes jańa medısınalyq nysandar salynyp, mekemelerdiń materıaldyq-tehnıkalyq bazasy nyǵaıtylmaq.
«Medısınalyq uıymdardyń materıaldyq-tehnıkalyq bazasyn jaqsartý úshin keıingi eki jylda jergilikti bıýdjetten 5 mlrd teńge bólindi. Sonyń nátıjesinde medısınalyq uıymdardyń zamanaýı quraldarmen jabdyqtalý deńgeıi 93 paıyzǵa jetti. Munyń bári óz kezeginde jergilikti jerlerde durys dıagnostıkalaý men sapaly emdeýge, syrqattyń aldyn alýǵa oń yqpalyn tıgizedi», deıdi basqarma mamandary.
Byltyr 3,1 mlrd teńgege 300 birlik medısınalyq tehnıka men 29 birlik sanıtarlyq avtokólik satyp alynǵan, bıyl da osy maqsatqa 4,7 mlrd teńge qarastyrylyp otyr.
Jetisý oblysy