ASTANA. 22 qańtar. Qaraǵandyda úıdegi tondy urlap ketý úshin 11 jastaǵy týys inisin óltirgen 20 jastaǵy qyzǵa sot bastaldy. Bul týraly Tengrinews.kz habarlady.
Oblystyq qylmystyq ister jónindegi arnaıy mamandandyrylǵan sotta ápkesiniń tonyn urlap ketý úshin onyń ulyn óltirgen qyzǵa qatysty sot prosesi iske kiristi.
Prokýror Saıan Aqqojın aıyptaý mánin málimdedi: ótken jylǵy 25 qyrkúıek kúni 11 jastaǵy Leon Serikbaev anasynyń sińlisi onyń tonyn urlap, sómkege salyp jatqanyn kórip qoıǵany úshin ajal qushty. Bul kezde balanyń ata-anasy jumysta bolǵan. Besinshi synypta oqıtyn bala mektepke barmaqshy bolyp kıinip jatqan. Qyz ony tondy qaıtyp ákeletinin aıtyp sendiredi.
Olar páterden shyqqannan keıin qyz balany óziniń Fedorovka aýdanyndaǵy úıine baryp kelýge kóndiredi. Qyz buǵan birinshi sabaqqa deıin jetkizetinin aıtady.
Osyǵan senip qalǵan bala naǵashy ápkesiniń sońynan eredi. Al úıge kirgen boıda qyz balany aldymen pyshaqpen uryp, artynan tunshyqtyra bastaıdy. Sosyn ústinen mektep formasyn sheship alyp, olardy portfel-oqýlyqtarymen qosa peshke órteıdi. Bári bitkesin balanyń óli denesin kóshedegi ájethanaǵa aparyp tastaıdy.
Balanyń joǵalyp ketkenin onyń ata-anasy №63 orta mekteptegi muǵalimi Leonnyń sabaqqa kelmegenin habarlaǵanda bir-aq biledi.
Osydan keıin eriktilerdiń qatysýlarymen Leon Serikbaevty izdeý bir táýlikke sozyldy.
Polıseıler bul arada jaǵdaıdy birshama teksere kelip, buǵan balanyń 20 jasar naǵashy ápkesiniń bar ekenin anyqtaıdy. Boıjetkenniń sonyń aldynda ul balany julmalap jetelep alyp bara jatqanyn, al Leonnyń oǵan ergisi kelmegen túr tanytqanyn kórgen kórshiler tabyldy. Quqyq qorǵaýshylar kúdikti qyzdy birden qamaýǵa aldy.
Tergeý eksperımentin júrgizýshiler qylmys ornyn kórsetýge shyqqanda kúdiktiniń ózin óte ádepsiz ustaǵanyn aıtty. «Kinásin moıyndap, jasaǵan isine ókinishin bildirgenine qaramastan, qyz oqıǵa ornyn kórsetip júrgende, ylǵı jymıyp, kúlýmen júrdi», - dep atap ótti olar.
Qurysh Nurymbet.
Derek, sýret: Tengrinews.kz.