1-synypqa baratyn balalardyń mektepke daıyndyǵy degende qalam, dápteri eske túsedi. «Balańyz sabaqqa daıyn ba?» dep suraǵanda da kóp ata-ana materıaldyq qajettilikke qaraı jaýap beredi. Al ol mektepke, eń aldymen, oqýǵa barady.
Bilim alýǵa balanyń daıyn nemese daıyn emes ekenin qalaı bilýge bolady? Balasy endi ǵana mektep tabaldyryǵyn attaǵaly otyrǵan ata-ana neni bilýi kerek? Kishkentaıy áli 6 jasqa tolmaǵandar ne isteıdi? Osy suraqtarǵa jaýap tabý maqsatymen jan-jaqty izdene bastaǵanymyzda, «Balaqaılar mektebi» atty kýrs týraly habarlandyrýdy kózimiz shaldy. Sóıtip, oqý oshaǵyna at basyn burdyq.
Biz barǵanda balaqaılar áripter ánin aıtyp jatty. Sodan soń olar ózderiniń bal tilimen dybystardyń daýysty, daýyssyz ekenin anyqtap aıtyp, qyzyl, kók túspen belgi qoıyp shyqty. Izinshe dáptermen jumys istedi. Mektepke, partaǵa, muǵalimge endi ǵana beıimdelip jatqan kishkentaılardyń arasynda úırenýge erekshe zeıin qoıǵandary da, qobaljyp otyrǵandary da baıqalady. О́ıtkeni balalardyń keıbiri 7-de bolsa, endi bireýleri 6 jasqa endi tolady. Olardy ata-analary ala jazdaı tek qana oıynmen ótkizbeı, mektepke daıyndyǵyn pysyqtaý úshin, 1-synypqa berý-bermeýin sheshý maqsatynda da arnaıy kýrsqa qatystyryp otyr. Bul – elordadaǵy №73 fızıka-tehnıkalyq lıseıindegi «Balaqaılar mektebi» kýrsy. Eń mańyzdysy, kýrs – balalarǵa tegin jáne turǵylyqty mekenjaıyna qaramastan qabyldanady. №73 fızıka-tehnıkalyq lıseı dırektory Gúlshat Zaıtqyzy osymen ekinshi lekke bala jınap jatqanyn jetkizdi. Onyń aıtýynsha, maýsym aıynda birinshi lek mektepke daıarlyq kýrsynan ótipti.
«Astana qalalyq bilim basqarmasynyń bastamasymen «Balaqaılar mektebi» kýrsyn tegin ótkizip jatyrmyz. Ata-analarǵa qulaqqaǵys retinde aıtqymyz keledi, negizi mundaı kýrs qaladaǵy mektepterdiń kóbinde bar. «Balaqaılar mektebiniń» basty maqsaty – balany mektepke beıimdeý, osyǵan qosa balaqaıdyń mektepke daıyndyǵyn anyqtaýǵa jáne pysyqtaýǵa berilgen múmkindik. Tájirıbemizden únemi baıqaımyz, kóp ata-ana balasynyń sanap, oqyp turǵanyn aıtyp jasy jetpese de, mektepke berýge asyǵady. Biraq balamen psıholog jumys istegende onyń áli de psıhologııalyq turǵyda mektepke daıyndalý kerek ekeni anyqtalyp jatady. Sol sebepti balanyń mektepke tek materıaldyq nemese oqý baǵdarlamasyn meńgerý jaǵynan ǵana emes, psıhologııalyq turǵyda daıyndyǵyna da basa nazar aýdarǵan durys. Munda balany árip tanyp, sanaýǵa ǵana úıretpeı, balalar psıhologimen, pedagogimen birge dıagnostıka jasap, ata-anasyna ár balamen ózinshe bólek jumys isteý keregin, ony ózgelermen salystyrýǵa bolmaıtynyn, barlyq jaǵynan daıyn bolǵanda ǵana mektepke berý ózine de, perzentine de durys ári jeńil bolatynyn túsindiremiz. Endi bir ata-analar orystildi balasyn qazaq synybyna berýge júreksinedi, bolashaǵyna alańdaıdy, ýaıymdaıdy. Bárin túsinemiz, alaıda qazaq tili qanynda, geninde bar balany qazaq synybyna berýden qoryqpaýǵa shaqyramyz. Mundaı balalar kóp jáne bári derlik alyp ketti, tipti úıdegilerin qazaqsha sóıletip jibergenderi boldy», dedi G.Zaıtqyzy.
Dırektordyń aıtýynsha, «Balaqaılar mektebi» kýrsy balanyń mektepke daıyndalýyna jáne ómiriniń jańa kezeńine senimdi túrde qadam basýyna kómektesedi. Kýrsta tájirıbeli pedagogterdiń jańa formattaǵy sabaqtary ótkiziledi. Sonymen qatar balanyń sóıleý áreketin jáne qol men saýsaqtardyń usaq bulshyqetterin, matematıkalyq is-áreket negizderin, tanymdyq (oılaý, zeıin, este saqtaý) jáne shyǵarmashylyq qabletterin damytý boıynsha keshendi jumys júrgiziledi. «Balaqaılar mektebiniń» ekinshi legine jınalǵan balalar 1-29 tamyz aralyǵynda oqıdy. Jumys kúnderi tańerteńgi saǵat saǵat 09.00-den 12.00-ge deıin ótkiziletin sabaqtardyń uzaqtyǵy – 30 mınýt, sabaq arasyndaǵy dınamıkalyq úzilisterge – 10mınýt.
№73 fızıka-tehnıkalyq lıseıi mektepke daıarlyq tobynyń muǵalimi Baqtygúl Tilepbergenqyzy balalardy mektepke daıyndaýda 4 daǵdyny qatar meńgerýine basymdyq beretinin aıtty. Bul – aıtylym, jazylym, tyńdalym jáne oqylym. Dál osy daǵdylar mektep baǵdarlamasynda da talap etiledi. «Qazir aldymda otyrǵan balalardyń basym bóligi, 80 paıyzy deýge bolatyn shyǵar mektepke daıyn. Al qalǵanyn mektepke daıyn emes deýge bolmaıdy, balada keıde fızıologııalyq jaǵynan qıyndyqtar kezdesedi. Mysaly, tobymdaǵy eki balanyń ata-anasy menimen, psıhologpen keńese kele 1-synypqa bıyl emes, kelesi jyly beretin boldy. О́ıtkeni mundaı jaǵdaıda mektepke barsa, qınalyp qalýy múmkin. Keı ata-analar arasynda «Balany mektepke daıarlyq kýrsyna berý keıin balanyń ishin pystyryp jiberedi-aý» degen oıdy jıi aıtady. Biraq bul qate, sebebi biz kýrsta 1-synyptyń baǵdarlamasyn ótpeımiz, sabaqty tek oıyn túrinde ótkizemiz. Sabaqta balanyń aıtý, jazý, oqý, tyńdaý daǵdylaryn qatar qalyptastyrýǵa nazar aýdaramyz. Bastysy, bala mekteptiń atmosferasyna beıimdeledi», deıdi B.Tilepbergenqyzy.