Dástúrge aınalǵan «Mereıli otbasy» ulttyq baıqaýynyń óńirlik kezeńi máresine jetti. Oblystyq baıqaýǵa óńirdiń barlyq aýdanynan úlgili otbasylar qatysyp, ónerin ortaǵa salyp, respýblıkalyq kezeńniń joldamasyn jeńip alýǵa tyrysty.
Is-sharaǵa óńir basshysy Erbol Qarashókeev arnaıy qatysyp, júldeli oryndardan kóringen mereıli shańyraq ıelerin marapattady. Sondaı-aq ol ulttyq baıqaýdyń taǵylymy men mańyzy týraly aıtyp, jeńimpaz otbasyǵa sáttilik tiledi.
«О́negeli otbasy – kez kelgen memlekettiń tiregi, urpaq tárbıesiniń bastaý bulaǵy. Otanǵa degen kirshiksiz mahabbat pen qylaýsyz qurmet úlgili otbasydan bastalatyny aqıqat. Dástúrge aınalǵan ulttyq baıqaý eńbegimen elengen, dástúrge degen adaldyǵymen daralanǵan shańyraqtardyń merekesine aınalǵany anyq. San salada tabysqa jetken otbasylar osy baıqaýda baq synaıdy. Olardyń jarasymǵa toly syılastyǵy men shynaıy otbasylyq qarym-qatynasy barshamyzǵa úlgi», dedi oblys basshysy marapattaý rásiminde.
On jyl boıy úzdiksiz uıymdastyrylyp kele jatqan baıqaýdyń óńirlik kezeńderinde kúni búginge deıin 2 myńnan asa otbasy baq synapty. Al osy jyly Taraz qalasy men aýdandyq deńgeıde topqa túsken 218 otbasynyń 22-si oblystyq kezeńge joldama alǵan.
Baıqaý qorytyndysy boıynsha bas júlde Tańatarovtar otbasyna buıyrdy. Bul áýlettiń úsh býyny, ıaǵnı ákesi, balalary men nemereleri – sportty janyna serik etken oǵlandar.
Shańyraqtyń úlkeni Dostyq Tańatarov úsh ulyn sportqa baýlyp ósirgen. Ol – erkin kúresten sport sheberi, aǵa jattyqtyrýshy. Uly áıgili erkin kúres sheberi Aqjúrek Tańatarov Qazaqstannyń eńbek sińirgen sport sheberi, London qalasynda ótken Jazǵy Olımpııa oıyndarynyń qola júldegeri bolsa, Aqnıet Tańatarov bokstan respýblıkalyq jarystardyń jeńimpazy atanǵan. Úshinshi uly Edige Tańatarov ta sportpen aınalysady, búginde «Birles» kókpar klýbynyń kapıtany.
Ata jolyn nemereleri de jarysymdy jalǵastyryp júr. Esýgeı men Ádil erkin kúresti janyna serik etse, Aızere kórkem gımnastıkamen turaqty túrde shuǵyldanady.
Baıqaýda baq synaǵan merkilik Eshetovter otbasy birinshi orynǵa laıyq dep tanylsa, ekinshi orynǵa shýlyq Baımaǵanbetovter, qulandyq О́mirbaevtar otbasy ıe boldy. Jambyldyq Absatarovtar men sarysýlyq Shynbatyrovtar áýleti úshinshi oryndy qanaǵat tutty.
Baıqaý jeńimpazdaryna dıplom jáne qarjylaı sertıfıkattar tabystaldy.
Taraz