Elimizdiń tynyshtyǵy men qaýipsizdigin qoryǵan taǵy bir áskerı keme táýelsiz elimizdiń kók baıraǵyn saltanatty jaǵdaıda kókke kóterdi. Mańyzdy sharaǵa Aqtaý garnızonyna jumys saparymen kelgen Qazaqstan Respýblıkasynyń Qorǵanys mınıstri Imanǵalı Tasmaǵambetov qatysty.
Elimizdiń Qarýly Kúshteriniń tapsyrysy boıynsha Oraldaǵy «Zenıt» zaýytynda qurastyrylǵan zymyrandyq-artıllerııalyq «Saryarqa» áskerı kemesi sýǵa ótken jyly jiberilgen edi. Sý yǵystyrǵyshtyǵy 250 tonnaǵa jýyq, uzyndyǵy 42 metr shamasynda jáne eń joǵary jyldamdyǵy 25-30 ýzel, júzý qashyqtyǵy 1200 mıldi quraıtyn keme qazirgi zamanǵy zymyrandyq-artıllerııalyq qarý-jaraqpen, navıgasııalyq qondyrǵylarmen jabdyqtalǵan.
Aqtaý halyqaralyq teńiz-saýda portynyń 7-shi turaǵynda sap túzegen áskerı-teńiz bazasynyń jeke quramy men jıylǵan jurtshylyq aldynda Áskerı-teńiz kúshteriniń týyn keme komandıri kapıtan-leıtenant R.Júnisovke tabystaǵan Qorǵanys mınıstri: «Saryarqa» kemesi – otandyq óndiristiń tól ónimi. Egemendik jyldary áleýeti artyp, ekonomıkasy asqaqtaǵan, sol arqyly qorǵanysyn qamdap, qaýipsizdigin arttyrǵan memleketimizdiń aqtalǵan mereıi. Kúndiz-túni týǵan elimizdiń, ár úıimizdiń túzý tútini men keń-baıtaq jerimizdiń bútindigin oılaǵan Elbasynyń sarabdal saıasatynyń jemisi. Bul bes qarýyn asynyp, bolashaqta osynaý áskerı kemeniń dańqyn asyratyn teńizshilerimiz úshin zor mártebe ǵana emes, úlken jaýapkershilik. Elbasy aldyndaǵy abyroıly paryz, el aldyndaǵy qasıetti borysh! – dep teńizshilerdiń ózderine júktelgen jaýapkershilikti abyroımen atqaratynyna senim bildirdi.
Mańǵystaý oblysynyń ákimi A.Aıdarbaev, Mańǵystaý oblysy Uly Otan soǵysy ardagerleri keńesiniń tóraǵasy, A.Ǵumarov sóz sóılep, áskerı kemege kóterilgen týdyń mán-mańyzy men qadir-qasıeti týraly baıandady. Jastardy Otandy súıýge, onyń aldyndaǵy mindetter men paryzdarǵa adal bolýǵa shaqyrdy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.