Astana qalasynda shahmattan rapıd jáne blıs boıynsha komandalyq álem chempıonaty túndigin túrdi. Esil ózeniniń jaǵalaýyndaǵy amfıteatrda komandalyq álem chempıonatynyń saltanatty ashylý rásimi ótti. Astana qalasy ákimdiginiń qoldaýymen KazChess Qazaqstan shahmat federasııasy uıymdastyratyn álemdik dodaǵa dúnıejúzilik reıtıngtiń kóshin bastaǵan úzdikter de qatysady.
Magnýs Karlsen, Hoý Ifan, álem chempıondary Szıýı Venszıýn men Dın Lıjen de elorda tórinde ótetin komandalyq dodada baǵyn synaıdy.
Chempıonattyń ashylý saltanatymen qatar taǵy bir mańyzdy is-shara ótti. Halyqaralyq shahmat federasııasynyń (FIDE) 100 jyldyǵyna arnalǵan 45-Shahmat olımpıadasynyń (Býdapesht, 10-23 qyrkúıek) saltanatty alaýyn alyp júrý estafetasy ótti. Qazaqstanǵa shahmat alaýy Fransııanyń Parıj qalasynan jetkizildi. Saltanatty is-sharany Premer-mınıstr Oljas Bektenov ashyp, FIDE prezıdenti Arkadıı Dvorkovıchtiń qolynan Olımpıada alaýyn qabyldady. Úkimet basshysy komandalyq chempıonatqa qatysýshylarǵa sáttilik tiledi.
«Shahmat – tórtkúl dúnıeni moıyndatqan ıntellektýaldy sport túri. Ǵasyrdan asa tarıhy bar Halyqaralyq shahmat federasııasy búginde álemniń 200-den asa elin sharshy taqta betinde toǵystyrǵan bedeldi ári tanymal uıymǵa aınaldy. Elimizde 200 myńnan asa adam shahmatpen shuǵyldanady. Qazaqstan Prezıdenti elimizdegi shahmatty qoldaý men damytýǵa erekshe kóńil bólip keledi. Olımpıada alaýynyń Astana qalasynda jaǵylýy – otandastarymyz úshin zor maqtanysh. Osyndaı joǵary deńgeıli is-shara ótkizý Qazaqstandaǵy shahmat sportynyń odan ári damýyna eleýli úles qosady dep senemin», dedi O.Bektenov.
Estafetanyń alaý ustaýshylary qatarynda KazChess prezıdenti Tımýr Týrlov, shahmattan álem chempıony (20 jasqa deıingiler arasynda) Qazybek Nógerbek, blıs boıynsha eki dúrkin álem chempıony Bıbisara Asaýbaeva, klassıkalyq shahmattan qazirgi álem chempıony Dın Lıjen, Azııa shahmat federasııasynyń vıse-prezıdenti jáne KazChess birinshi vıse-prezıdenti Dármen Sádýaqasov, Ǵylym jáne joǵary bilim mınıstri Saıasat Nurbek, Balalar quqyǵy jónindegi ýákil Dınara Zákıeva, ushqysh-ǵaryshker, «Halyq qaharmany» Talǵat Musabaev syndy azamattar bar. Amfıteatr sahnasynda Shahmat olımpıadasynyń alaýyn jaǵý qurmeti birneshe dúrkin álem chempıony qytaılyq shahmatshy Hoý Ifange buıyrdy.
Chempıonattyń ashylý saltanatynda quttyqtaý sóz sóılegen Astana qalasynyń ákimi Jeńis Qasymbek elordanyń baı shahmat dástúri bar ekenin jáne onyń óz chempıondaryn erekshe maqtan tutatynyn jetkizdi.
«Buǵan deıin ótken týrnırler, atap aıtqanda, álem chempıony ataǵyn alý matchy, áıelder arasyndaǵy Gran-prı kezeńi, rapıd jáne blıs boıynsha álem chempıonaty Astana halqynyń shahmatty jaqsy kóretinin, oıynnyń ádemiligin baǵalaı biletinin kórsetti. Astananyń jınaǵan tájirıbesi, jaǵdaıy men ınfraqurylymy kez kelgen aýqymdaǵy shahmat chempıonattaryn ótkizýge múmkindik beredi. Aldaǵy ýaqytta elordamyz Dúnıejúzilik shahmat olımpıadasy men basqa da bedeldi jarys ótetin orynǵa aınalady dep senemin», dedi Astana ákimi.
«Búgin biz rapıd jáne blıs boıynsha komandalyq álem chempıonatyn ashyp otyrmyz. FIDE úshin bul jańa format qazirdiń ózinde kóptegen kórermen men shahmatshylardyń ózderine de unap qaldy. Chempıon ataǵyn alýǵa úmitkerler retinde baq synasý úshin Astanaǵa álemniń eń myqty grossmeısterleri, sonyń ishinde álemdik reıtıngtegi birinshi turǵan álem chempıondary keldi. Bul kúnderi biz kóptegen qyzyqty oıyn men tartysty kezdesýdiń kýási bolatynymyzǵa senimdimin! Biz eldiń basshylyǵyna, Qazaqstan shahmat federasııasyna elde ǵana emes, álemde shahmatty damytýǵa zor úles qosyp jatqany úshin alǵys aıtamyz», dedi FIDE prezıdenti Arkadıı Dvorkovıch.
«Dúnıejúzilik shahmat olımpıadasy alaýynyń Qazaqstan jerinde jaǵylýy – elimizdiń álemdik shahmat ortalyqtarynyń biri ekeniniń aıǵaǵy. Álemniń úzdik shahmatshylary – Magnýs Karlsen men Hoý Ifan qatysatyn rapıd jáne blıs boıynsha komandalyq álem chempıonaty tartysy ótetini sózsiz. Bul – shahmat álemi úshin ǵana emes, búkil Qazaqstan sporty úshin aıtýly oqıǵa. О́ıtkeni jarysqa elimizdiń kóptegen komandasy men sportshysy, sonyń ishinde áýesqoılar da qatysady», dedi KazChess prezıdenti Tımýr Týrlov.
Shahmat dodasy elordanyń Kongress-ortalyǵynda ótedi. 5 tamyzǵa deıin jalǵasatyn álemdik dodanyń júlde qory – 350 myń eýro. Ár sanat boıynsha úzdik atanǵan úsh komandanyń músheleri kýbok, aqshalaı syıaqy jáne altyn, kúmis qola medaldarǵa ıe bolady. Álem chempıonatyna qatysatyn 39 komanda quramyna engen álemniń 315 úzdik shahmatshysy oı dodasyna túsedi.