Qazaqstannyń jeńil atletıka tarıhyndaǵy tuńǵysh álem chempıony Nora Djerýtodan da kúterimiz kóp. 3 000 metrge kedergiler arqyly júgirýde ol márege 9 mınýt 16,46 sekýndta jetip, besinshi satyǵa turaqtady. Osy kórsetkish onyń fınalǵa joldama alýy úshin jetkilikti boldy. Endi aqtyq synda tek jelmen jarysqan júırikter ǵana saıysqa túsedi. Arasynda osaly joq. Barlyǵy da myqty. Desek te biz Djerýtadan asa joǵary nátıje kútemiz. Dál osy jelaıaq Qazaqstan qurama komandasynyń qorjynyna taǵy bir medal salýǵa tıis.
Irikteý saıysy aıaqtalǵan tusta BAQ ókilderine bergen suhbatynda Nora: «Olımpıadaǵa qatysýdy balaýsa shaǵymnan armandadym. Maǵan sondaı múmkindik berip, dańǵyl jol ashyp bergen Qazaq eline dán rızamyn. Byltyr meniń náresteli bolǵanymdy bilesizder. Qazir balam bir jasqa toldy. Dekrettik demalysymdy tez aıaqtap, tórtjyldyqtyń basty dodasyna tyńǵylyqty daıarlandym. О́ıtkeni jaýapkershiliktiń júgin jan-tánimmen sezindim. Qazirgi kezde barsha Qazaqstan halqy menen júlde kútip otyr. Solardyń senimin aqtaý úshin esh aıanbaımyn», dep aqtaryla sóıledi.
Ulttyq komandamyzdyń sapyndaǵy taǵy bir kenııalyq legıoner Deızı Djepkemeı 10-oryn alyp, jarysty merziminen buryn aqtady. Biraq ol áli 10 000 metrlik qashyqtyqqa júgiredi. Bálkim, Deızı sol saıysta táýir nátıje kórseter. Sondaı-aq 200 metrge júgirýde Olga Safronovanyń da úzdikter qatarynan kórinýge múmkindigi bar. Olımpıadanyń ashylý saltanatynda Aslanbek Shymbergenovpen birge tý ustap shyqqan tanymal sportshy irikteý synynda 8-oryndy ıemdendi. Ýaqyty – 23,58 sekýnd. Endi Olga jubanysh básekesine qatysady. Al Elızaveta Matveeva men Nadejda Dýbovıskaıa (bıiktikke sekirýshi), Ásem Orynbaı men Edýard Eshenko (stend atýshy), Danııl Musabaev (batýtta sekirý), taǵy basqa da sportshylar óz jankúıerlerin jerge qaratty.
Keshe grek-rım kúresi sheberleri óz básekelerin bastady. Alǵashqy bolyp bozkilimge eń jeńil salmaqtaǵy Aıdos Sultanǵalı men asa aýyr salmaqtaǵy Álimhan Syzdyqov shyqty. Aıdos Qyrǵyzstannyń maqtanyshy Jolaman Sharshenbekovpen aıqassa, Álimhan Rýmynııanyń betkeustary Alın Chýrarıýmen kúsh synasty. Búgin «klassıkterdiń» jarysy jalǵasady. Aldaǵy kúnderi biz áıelder kúresi men erkin kúres sheberleriniń tartysyn tamashalaımyz.
P.S. Parıj Olımpıadasynyń jalpy komandalyq esebinde AQSh quramasy alǵa shyqty. Amerıkalyqtardyń qorjynynda 19 altyn, 26 kúmis jáne 26 qola medal bar. Olardy Qytaı ókshelep keledi. Atalǵan eldiń ókilderi 19 altyn, 15 kúmis jáne 11 qolany oljalady. Úzdik úshtikti Fransııa túıindep tur. Jarys qojaıyndary 12 altyn, 14 kúmis jáne 18 qolany enshiledi. Sondaı-aq TOP-10 komandanyń qatarynda Aýstralııa (12+11+8), Ulybrıtanııa (10+12+15), Ońtústik Koreıa (10+7+7), Japonııa (9+5+10), Italııa (7+10+5), Nıderland (6+5+4), Germanııa (5+5+2) quramalary bar. Bul tizimde Qazaqstan 29-orynda tur. Otandastarymyz ázirge 1 altyn, 1 kúmis, 2 qolany qanaǵat tutyp otyr.