Tarıhqa kóz júgirtsek, Almaty temirjolynyń elektrlendirilýi 1984 jyly Moıynty – Shý baǵytynda bastalǵan eken. Shý temirjol bólimshesiniń alǵashqy elektrlendirilgen Moıynty – Saryshaǵan ýchaskesi 1985 jyly, Shyǵanaq ýchaskesi 1986 jyly paıdalanýǵa berilipti. 1988 jyldyń qarashasynda Shý torapty stansasyna alǵash ret elektrovoz keledi.
Al 1995 jyly 4 qańtarda TransQazaqstan temirjol magıstraliniń Lýgovoı – Shý telimin elektrlendirý jumysy aıaqtalyp, onyń saltanatty iske qosylýyna qatysqan Elbasy Nursultan Nazarbaev bul jeliniń elimizge, halqymyzdyń bolashaq ómirine tıgizetin paıdasy óte zor ekenin aıta kelip, «Uly Jibek joly bolat magıstrali arqyly qaıta jańǵyryp, osy arqyly Qazaqstan Tynyq muhıtta Eýropa elderine jetetin transkontınenttik temirjol jelisine qosylyp otyr», degen bolatyn. Mine, oblys úshin ǵana emes, búkil elimiz úshin mańyzy zor bolǵan Shý – Lýgovoı temirjol bóligin elektrlendirýdiń 20 jyldyǵyna arnalyp memorıaldy belgi qoıyldy.
Shynynda, táýelsizdigimizdiń alǵashqy jyldarynda bul temirjol bóligi óńirdiń ǵana emes, búkil respýblıkamyzdyń temirjol tasymalyn arttyrýǵa úlken úles qosty. Elektrlendirilgen temirjoldar TMD men Qazaqstannyń kólik júıesinde búginde negizgi kúsh bolyp, júk jáne jolaýshy tasymalynyń denin atqaryp keledi. Búginde Qazaqstan temirjoly iri tasymaldaýshy ǵana emes, Jambyl oblysynyń ındýstrııasyn damytýda kóshbastaýshy ulttyq kompanııa bolyp tabylady.
– El men eldi, qala men aýyldy baılanystyryp otyrǵan jol qatynasynyń el ekonomıkasy úshin qashanda mańyzy zor. Al osy qatynastyń basym bóligin qamtyp, aýyr júgin arqalap otyrǵan temirjol salasy ekeni barshaǵa belgili. Sonaý 60-shy jyldary paravozdyń ornyn almastyrǵan teplovozdarǵa tań-tamasha qarasaq, búginderi júıitkigen elektr poıyzdarǵa qol jetkizip otyrmyz. Shý qalasynyń árbir turǵyny temirjoldyń dúrsilin jórgeginde estip ósse, halyqtyń 70 paıyzynyń eńbek joly osy temirjol salasymen baılanysty. Áýlıeata óńiri tirshiliginiń «kúre tamyry» bolǵan elektrlendirilgen bolat jolynyń berekesi kirip, dańqy arta tústi, – deıdi Jambyl oblysynyń ákimi Kárim Kókirekbaev.
Jıyn sońynda birqatar temirjolshylarǵa qurmet gramotasy men alǵys hattar tapsyryldy.
Oralhan DÁÝIT,
«Egemen Qazaqstan».
Jambyl oblysy,
Shý aýdany.
Sýretti túsirgen
Aqádil RYSMAHAN.