Jasóspirimder kólik apatyna jıi ushyraıdy

Oblystyq polısııa departamenti bastyǵynyń birinshi orynbasary, polısııa polkovnıgi Ábdiǵanı Seıdýalıevtiń aıtýynsha, keıingi kezde moped, motosıkl men skýter júrgizýshileri jasaǵan jol-kólik oqıǵasy jıileı bastady. Máselen, bıyl jyl basynan beri elektrli kólikterdiń júrgizýshileri tarapynan ­930 quqyq buzýshylyq tirkeldi.

«Quqyq buzýshylarǵa ákimshilik hattama toltyryldy. Arnaıy aıyp turaǵyna 120-dan astam skýter, moped qoıyldy. Júrgizýshiler­diń basym bóligi jyldamdyqty asyryp, aldyndaǵy kólikti basyp ozady. Baǵdar­shamnyń qyzyl túsine toqtamaı, qaýip­siz­dik talaptaryn saqtamaıdy. Tájirıbege súıensek, mundaı kólik túrlerin jasóspirimder júrgizedi. Kámeletke tolmaǵan júrgizýshiler jolda júrý erejesin jıi buzady», deıdi Á.Seıdýalıev.

Onyń pikirinshe, jasóspirimderdiń deni motosıkl, moped pen skýterdi qujatsyz júr­gizedi. Al ata-analary balalarynyń osyndaı zań buzýyna, tipti qaýipsizdigine mán bermeıdi.

«Tek Atyraý qalasynda jyl basynan beri elektrli kólik júrgizýshiler buzǵan 106 jol-kólik oqıǵasy tirkeldi. Jol apatynyń saldarynan 53 adam dene jaraqatyn aldy, 5 adam qaıtys boldy», dep málimdedi Á.Seıdýalıev.

Balasyna moped alyp bergen turǵynnyń biri – atyraýlyq Tımýr Raqyshev. Alaıda onyń uly bir jyl buryn jol apatyna túsipti. Qazir dárigerge qaralyp júr.

«Ata-ananyń bári balalaryn qýantqysy keledi. Men de bir jyl buryn 14 jastaǵy ulymdy qýantý úshin moped alyp bergen edim. Biraq balanyń bir kúngi qýanyshyn emes, bolashaǵyn oılaý qajettigin kesh túsinip otyrmyn. Qazir kóshede moped aıdap júrgender jol erejesin jıi buzady. Tipti olardyń júrisinen qorqatyn boldym. Mopedshiler eki kúnniń birinde jol apatyna ushyrap jatyr. Zardap shegetinder de – mopedshiler men skýtershiler. Kóbiniń jasy áli 18-ge de tol­maǵan. Qazir arbada otyrǵan balamdy kór­gen­de, bir kún­gi qýanyshy úshin bolashaǵyna bal­ta shap­tym-aý dep ókinemin», deıdi T.Raqyshev.

Atyraý qalalyq polısııa basqarmasy patrýldik polısııa batalonynyń komandıri Dáýren Nasıpollanyń aıtýyna qaraǵanda, byltyrǵy 29 maýsymda jol qozǵalysy týraly zańnamaǵa ózgerister engizilgen. Soǵan sáıkes endi skýter, moped, samokat júrgizýshilerine talap kúsheıtilip otyr. Olardyń jolda júrý erejesin buzǵany anyqtalsa, «Ákimshilik quqyq buzýshylyq týraly» kodekstiń 127, 440, 620 jáne 593-baptaryna saı ákimshilik hattama toltyrylady.

Máselen, Jylyoı aýdanynyń ortalyǵy Qulsary qalasynda 15 jastaǵy jasóspirim mo­pedpen kele jatyp, ózge kólikke soqty­ǵys­qan. Bul is Atyraý oblystyq kámeletke tolmaǵandardyń isteri jónindegi maman­dandyrylǵan aýdanaralyq sotynda qaraldy. Jol qozǵalysy erejesin buzǵan jasóspirimniń anasy R.S-ǵa qatysty «Ákimshi­lik quqyq buzýshylyq týraly» kodekstiń 127-baby 3-bóligimen ákimshilik is qozǵalǵan.

«R.S-nyń kámeletke tolmaǵan 15 jastaǵy uly N.L. bıyl mamyr aıynda Qulsary qalasynda «Samýraı» mopedin júrgizýshi kýáliginsiz júrgizgen. Sóıtip, «Toyota Camry» markaly kóligimen soqtyǵysty. Anasynyń ulyn tárbıeleý jónindegi mindetterin tıisinshe oryndamaýynyń saldary kámeletke tolmaǵan jasóspirimniń ákimshilik quqyq buzýshylyq belgileri bar qasaqana is-áreket jasaýyna alyp kelgen. Anasynyń kinási is qujattarymen tolyq dáleldendi. Ol sotta kinásin moıyndap, ulynyń áreketi úshin keshirim surady», dep habarlady oblystyq sottyń baspasóz qyzmeti.

Sot qaýlysymen R.S. joǵaryda kórsetilgen bappen kináli dep tanyldy. Onyń jeke basy, jaýap­kershiligin jeńildetetin mán-jaı, quqyq buzýshylyqtyń sıpaty eskerildi. Sot qaýlysymen jasóspirimniń anasyna 51 myń 688 teńge kóleminde ákimshilik aıyppul salyndy.

Munaıly shahar mańyndaǵy Vodnıkov aýy­lynda moped júrgizýshisi Kia Sportage avto­kóligine soqtyǵysty. Jol apatynyń saldarynan mopedtiń júrgizýshisi oqıǵa ornynda mert boldy. Kóz jumǵan jigittiń jasy 20-da.

Osyǵan uqsas taǵy bir oqıǵa Qyzylqoǵa aýdanynyń Saǵyz aýylynda tirkeldi. Munda kámeletke tolmaǵan jasóspirim motosıklmen kele jatyp túıege soqtyǵysqan. Aýyr jaraqat alǵan 14 jastaǵy jasóspirim oqıǵa ornynda kóz jumdy.

Atyraý oblysy