Balýandar bozkilemge shyqty

Stend atýdyń skıt túri bo­ıynsha aralas koman­dalyq saıysta Edýard Eshenko men Ásem Orynbaı irik­teý týrnırinde nebári 140 upaı jıyp, 12-oryndy qanaǵat tutty. Bul kórsetkish jerlesterimizge fınal­ǵa shyǵý úshin jetkiliksiz edi. Olga Safronova 200 metrge júgirýde jubanysh básekelerine qatys­ty. Biraq ol da senimdi aqtamady. Bes qarsylasynyń birde-bireýinen oza almaǵan Safronova eń sońǵy oryn­da qalyp qoıdy.

Dúısenbide balýandardyń bá­sekesi bastaldy. Alǵashqy bolyp bozkilemge grek-rım kúresi she­berleri shyqty. 60 kg salmaq dá­rejesinde óner kórsetken Aıdos Sultanǵalı tusaýkeser kezde­sýin Jolaman Sharshenbekovke qarsy ótkizdi. Syr boıynan kelgen saıypqyrannyń álem chem­pıonatynyń altyny men kúmisin eki retten oljalap, Azııa oıyn­darynyń jeńimpazy, Azııanyń úsh dúrkin chempıony jáne eki dúrkin fınalısi atanǵan 24 jastaǵy ataqty qyrǵyz balýanyna áli jetpedi. Ol 3:6 esebimen ese jiberdi. Sodan ke­ıin tek qyrǵyzdar ǵana emes, barsha qazaq jankúıerleri de Jolaman­nyń jolyna úlken úmitpen qarady. О́ıtkeni ol aqtyq synǵa deıin alqynbaı jetse, Aıdosqa qola medal úshin talasý múmkindigi týyndaıdy. Biraq úkili úmit aqtalmady. Qyrǵyzstannyń sańlaǵy shırek fınalda Rýmynııa sportshysy Razvan Arnaýtty aıqyn basymdyqpen (9:0) utqanymen, jartylaı fınalda Japonııanyń juldyzy Kenıtıro Fýmıtadan aılasyn asyra almady – 3:4. Endi sheshýshi aıqas Fýmıta men qytaılyq Lıgýo Sao arasynda ótedi. Al úshinshi oryn úshin talasatyn Sharshenbekov pen soltústikkoreıalyq Rı-Se-Ýnniń qarsylastary jubanysh beldesýlerinen keıin anyqtalady.

130 kg salmaqta Álimhan Syzdyqov kúresti. Jarysty ol sátti bastady. Shymkenttik balýan alǵashqy aınalymda álem chempıonatynyń qola júldegeri, Eýropa chempıony, rýmynııalyq Alın Chırarýdy 3:1 esebimen basym túsip, jankúıerlerdi bir jelpindirip tastady. Odan keıin Rıo Olımpıadasynyń qola júldegeri, Álem kýboginiń ıegeri, Azııa oıyndary men chempıonatynyń júldegeri Sabah Sharıatımen aıqasty. Bul tartys Ázerbaıjannyń namysyn qorǵap júrgen 35 jastaǵy ırandyq legıonerdiń paıdasyna sheshildi – 0:4. Jartylaı fınalda Sabah san soǵyp qaldy. Olımpıadanyń tórt dúrkin chempıony Mıhaın Lopes ony esh qınalmaı-aq eńserdi – 4:1. Ázerbaıjandyq jeńilgennen keıin Álimhan úshin de jarys aıaqtaldy.

Bir aıta keterligi, Olımpıadada 3 (0 altyn+1 kúmis+2 qola), álem chempıonatynda 10 (5+3+2), Eýropa birinshiliginde 13 (11+2+0), Álem kýboginde 2 (1+1+0) retten jeńis tuǵyryna kóterilip, Eýropa oıyn­dary men Dúnıejúzilik ýnı­ver­sıadada top jarǵan Ryza Kaıalp bul jarysqa qatyspady. Dáp sol Túrkııanyń tarlany dańqy jer jarǵan Mıhaın Lopestiń dúbirli dodalardaǵy bitispes qarsylasy edi. Ekeýiniń joly únemi sheshýshi tusta qıysatyn. Alaıda kúni keshe ǵana áıgili balýannyń dopıng qoldanǵany anyqtalyp, Kaıalp birer jylǵa úlken sporttan shettetildi. Sodan keıin jer-jahan jankúıerleri Bostandyq aralynan at terletip kelgen apaıtósti 2023 jylǵy álem chempıony jáne 2022 jylǵy sol jarystyń kúmis júldegeri, Azıadanyń jeńimpazy, 26 jasta­ǵy ırandyq Ámın Myrzazade toqtatatyn shyǵar dep oılady. Qansha degenmen ol Lopesten ba­qandaı 15 jas kishi. Qazir Parsy pehlevanynyń naǵyz jalyndap turǵan shaǵy. Biraz ýaqyttan beri kóptegen baıraqty básekede Ámınniń asqan sheberligine tánti bolyp, zor áleýetin baıqaǵan edik. Alaıda Parıj tórinde 41 jasta­ǵy azýly arystan jas jolbarys­qa aldyrmady. Bul básekede Bos­tan­dyq aralynyń balýany asyq­paı-aptyqpaı júrip-aq, saýatty taktıkasy arqyly Myrzazadeni jolynan yǵystyrdy – 3:1. Sóıtip, fınalda Mıhaın Lopes pen chılılik Iаsmanı Akosta kúsh synasady. Al Sabah Sharıatı men qytaılyq Lınchje Menniń qarsylastary sál keıinirek belgili bolady.

Sol kúni áıelder kúresi sheber­leri de óz ónerin ortaǵa saldy. Olar 68 kg salmaq dárejesiniń júldeleri úshin tartysty bastady. Bastapqy básekelerde barlyq qarsylasyn sypyra utqan Meıirim Jumanaza­ro­va men Emıt Elor jartylaı fı­nalda da jeńiske jetti. Qyrǵyz ­qy­zy úshin jeńis ońaılyqpen kelgen ­joq. Ol Tokıo Olımpıadasynyń kú­mis júldegeri, Afrıkanyń 13 dúr­kin chempıony, nıgerııalyq Bles­sıng Oborýdýdýdany áýpirimdep júrip ázer utty. Al AQSh-tyń arýy soltústikkoreıalyq Pak Sol-gýmdy jyǵyp aldy da, aıaǵynan myqtap ustap, bozkilemde shyr aınaldyrdy. Sóıtip, esep 10:0-ge jetkende baryp qana toqtady. Dál osy tásildi Elor osydan eki jyl buryn Belgradtaǵy álem chempıonatynyń fınalynda bizdiń Jámıla Baqbergenovaǵa qar­sy sátti qoldanǵan edi. Sol kezde ­18 jas­taǵy boıjetken álem chempıony atansa, kelesi jyly sol nátıjesin qaıtalady. Mine, endi 20 jasynda Olımpıadanyń altyn tuǵyryna kóterilýge shaq qaldy. Ol úshin Emıt Elor Tokıodaǵy oıyndardyń ­qola júldegeri, álem chempıony Meıi­rim Jumanazarovany jeńýi kerek. Biraq Alataýdyń bókterinen kel­gen burymdynyń da ońaılyqpen beri­le qoımaıtyny anyq. Sol sebepti de alda kórermendi keskilesken aı­qas kútip tur dep aıtýǵa tolyq negiz bar.

Bul kúnderi dúıim jurt boks­shylardyń básekelerin de taǵat­syzdana kútip júrgeni ras. Qazirdiń ózinde keıbir salmaq dárejesinde bas júlde úshin aıqasatyn arlan­dar men tarlandar anyqtalyp ta qoı­dy. Tarqatyp aıtsaq, 51 kg salmaq­ta Hasanboı Dýsmatov (О́zbekstan) pen Bilál Bennama (Fransııa), 63,5 kg salmaqta Sofıan Ýmıa (Fran­sııa) men Erıslandı Alvares (Kýba), 80 kg salmaqta Nurbek Oral­baı (Qazaqstan) men Aleksandr Hıj­­­nıak (Ýkraına) jáne 92 kg salmaqta ­Lo­ren Alfonso Domınges (Ázerbaı­jan) pen Lázızbek Mýllajonov (О́zbekstan) judyryqtasady. Taǵy úsh jup aldaǵy kúnderi anyqta­la­dy. Sol sekildi áıelder de sharshy alańǵa shyǵady. Bul básekelerde kúlli qazaq jankúıerleri Nazym Qyzaıbaıǵa úlken úmit artyp otyr. Asa jeńil salmaqtaǵy qazaq qyzy Qytaı boksshysy Ý Iýmen qolǵap túıistiredi.