Elimiz syıaqy berýden de toǵyzynshy orynda

Syıaqyny molynan beretinder tiziminde Qazaqstan toǵyzynshy orynda tur. Qazaq elinde chempıonǵa – 250 000, kúmis pen qola júldeger­ler­ge tıisinshe 150 000 jáne 75 000 dollar tóleý qarastyrylǵan. Sondaı-aq eń kóp syıaqy bere­tinderdiń TOP-ondyǵynda Túrkııa (A – 380 000, K – 230 000, Q – 115 000), Grýzııa (A – 370 000, K – 185 500, 92 700), Taıland (A – 365 150, K – 219 090, Q – 146 060), Indonezııa (A – 346 000, K – 138 500, Q – 69 250), Izraıl (A – 276 100, K – 207 100, 138 000), Malaızııa (A – 236 000, K – 71 000, Q – 24 000) syndy memleketter bar. Eýropanyń damyǵan memleketteri tórt­jyl­dyqtyń basty dodasynda daralanǵan sport­shy­larynyń tabysyna asa bir emirene qoımaıdy. Máselen, osy Olımpııa oıyndaryn uıymdasty­ryp otyrǵan Fransııada bas júlde 80 000 eýroǵa baǵalanady. Germanııada chempıonnyń esepshotyna 20 000 ǵana aýdarylady. Al Ulybrıtanııa, Norvegııa, Shvesııa sekildi birqatar elde syıaqy jaǵy múlde qarastyrylmaǵan. Joǵaryda atalǵan alpaýyttarǵa qaraǵanda qart qurlyqtaǵy Italııa (altyn úshin beriletin syıaqy 212 000 dollar), Ýkraına (125 000), Ispanııa (110 000), Majarstan (166 000), Chehııa (111 000) úkimeti basqaryp otyrǵan azamattardyń qoldary ashyq eken. О́zge qurlyqtarǵa keler bolsaq, Úndistannyń úkimeti altyn alǵan dúldúlge 83 000 eýro tólese, atalǵan eldiń Ulttyq Olımpıada komıteti qosym­sha 110 000 beredi. Ońtústik Koreıadan shyqqan chempıon­darǵa 42 000 eýrolyq syıaqydan bólek, taǵy birqatar jeńildik qarastyrylǵan. Olar aı saıyn 673 eýro kóleminde ǵumyrlyq syıaqy alyp turady nemese birden 47 000-dy óz esepshotyna aýdarady. Tańdaý sportshynyń ózinde. Álemdik saıasatta ústemdik júrgizip otyrǵan AQSh Olımpıada chempıonyna 37 500 dollar tóleýmen shekteledi. Júldegerler 22 500 jáne 15 000 alady. Alpaýyt AQSh-tyń dál irgesinde ornalasqan Kanadanyń beretini odan da az. Olar bas júldeni bar-joǵy 16 000-ǵa baǵalap otyr. Ekonomıkasy qaryshtap damyp ketken Japonııa da sportshylaryn qaryq qylmaıdy. Kúnshyǵys elinen shyqqan Olımpııa oıyndarynyń jeńimpazyna 45 000 dollar tólenedi. Kezinde KSRO quramynda bolǵan memleketter arasynda eń kóp syıaqy beretin Grýzııa men Qazaqstan ekenin joǵaryda aıttyq. Sol sekildi ázerbaıjandar da márt eken. Olar chempıonnyń qolyna 235 000 dollar ustatady. Al kórshilerimiz jaıynda aıtar bolsaq, altyn tuǵyrǵa kóterilgen sańlaqtyń esepshotyna О́zbekstanda – 200 000, Qyrǵyzstan Respýblıkasynda – 119 000,Tájik­standa 14 000 dollar aýdarylady.