Saýdada saltanat bar. Tutynýshynyń tilin taba bilseńiz, sharýa sheshimin tapty deı berińiz. Muny jas saýdager Álı Muhammedke qarata aıtsaq ábden bolǵandaı. Áleýmettik jeli juldyzyna aınalǵan kásipker jemis-jıdek pen kókónistiń bárin óleńdetip tanystyrady.
Álı Muhammed túrli rolık túsirip, arnaıy blog júrgizedi. Kókónis dúkeni týraly túrli kontent ázirlep, eldi eliktirip áketedi. Álıdiń ereksheligi sol – saýda-sattyq kezinde adamnyń tábetin ashatyn óleńderdi lezde qurap, aıtyp beredi. Jetisýlyq azamattyń jigerli isine súısinbeý múmkin emes. Tipti, taldyqorǵandyqtar Álıdi arnaıy izdep ortalyqqa barady. Bazarda joq bolsa, kútýge ázir. Onyń satqan ónimi oblys ortalyǵynyń eń dámdi taýarlarynyń biri. Mańaıyndaǵy saýdagerler de jas kásipkerdiń jarnamasyna táýeldi. Baǵasyna kelisse, áriptesteriniń de qolyn qaqpaıdy.
«Osydan on jyl buryn kelinshegim ekeýimiz shaǵyn saýda dúkenin ashyp, osy salaǵa bet burdyq. Mine, sodan beri jemis-jıdek satyp kele jatyrmyz. Al áleýmettik jelige shyqqanyma bir jyl ǵana boldy. Onyń ózi de qyzyq oqıǵa. Jaqyn dosym Hafız uıaly telefonyna túsirip, áleýmettik jelige salyp jiberdi. Sodan taralym údep, tutynýshylar sany arta tústi. Osylaısha, muny ári qaraı damytaıyn degen oı keldi. Qoǵam jaqsy qabyldady. Kúnniń ystyǵyna qaramaı, meniń óleńderimdi tyńdap turady», deıdi Á.Muhammed.
О́ńirdegi apa-atalar bazarǵa arnaıy kelip, Álıdiń óleńderine qulaq túredi eken. О́nerin tamashalaý úshin basqa qaladan at arytyp jetetinder de qanshama. Olar saýdagermen sýretke túsýge yntyq.
Aıttyq qoı, aldy qashan kórseń qarbalas. Ondaıda keıipkerimiz:
«Jaqsy kórem, ápkem menen jezdemdi,
Úıge búgin jemis alar kez keldi.
Álı jaqqa búgin kele berińiz,
Ol baǵasyn túsirem dep sóz berdi» dep óleń qurap jiberedi.
«Eki balam – bir ul, bir qyzym bar. Eki baldyrǵanymnyń bolashaǵy úshin tynbaı eńbek etýge ázirmin. Sodan ba únemi oıyma kreatıvti ıdeıalar keledi. Ony birden iske asyramasańyz, saýdaǵa aldanyp ketesiz. Sodan oıdaǵy dúnıem iske aspaı qalady. Belgili bir ýaqytty tańdamaımyn, jumys arasynda qolym qalt bosaǵanda beınerolıkter túsirip, áleýmettik paraqshama salamyn», deıdi jas saýdager.
Búginde keıipkerimizdiń «Instagram»-daǵy paraqshasynda 124 myń jazylýshy bar. Oǵan qosymsha «YouTube» jáne «Tik Tok» paraqshalaryna da qyzyqty kontent túsirip turady. Bloger retinde Taldyqorǵan qalasyndaǵy ártúrli saýda núktelerin, dúkender men brendterdi jarnamalaıdy. Erinbeı jasaǵan eńbektiń nátıjesinde oblys ortalyǵyndaǵy «Kókbazar» bazarynan jeke kókónis dúkenin de ashqan.
«Satýshynyń jumysy ońaı emes. Jumys tańerteń erte bastalyp, keshke deıin jalǵasýy múmkin. Saýda uqyptylyqty, shydamdylyqty, fızıkalyq kúsh pen adamdarmen qarym-qatynasta úlken tájirıbeni talap etedi. Kún saıyn bizge ártúrli adam keledi. Árbir satyp alýshyǵa ózindik kózqaras qajet. Bul da bizdiń tarapymyzdan orasan zor eńbek der edim. Biraq maǵan osy jumysym erekshe unaıdy», deıdi ózi.
Tutynýshylarǵa kóterińki kóńil kúı syılap júrgen jas saýdager bolashaqta úlken saýda úıin ashýǵa nıetti. Onyń aıtýynsha, barlyq qyzyǵýshylyq tutynýshynyń emosııasynda jatyr.
«Qazir adamdarǵa azdap nazar jetispeıdi. Bir-birimizge sál de bolsa kóńil bólsek, dúnıede zulymdyq az bolar edi. Áreketim adamdarǵa jaqsy kóńil kúı syılap, jan saraıyn sergitip jatsa, meniń de janym jaı tabady», deıdi Álı.
Zań salasynda bilim alǵan jas jigittiń qareketine qaıran qalasyz. Quddy janyp turǵan ot sekildi. Tutynýshynyń nazaryn birden ózine tartyp alady. Al saýda da bireýdiń nazaryn ózine qarata bilý – úlken jetistikpen para-par.
Jetisý oblysy