Atyraýdyń kóshelerin artqy áınegine Parıj Olımpıadasynyń chempıony Eldos Smetovtiń portreti salynǵan jeńil kólik kezip júr. Chempıonnyń beınesin kólik ıesi sirińkeden quraǵan.
Kólik ıesi – Aslan Jazyqovtyń mamandyǵy sýretshi emes. Biraq bala kezinen sýret salýdy unatady. Qoly bosaǵan sátte oıynda júrgen beınelerdi, tabıǵat kórinisin aq qaǵazǵa túsiredi.
«Jahan jurty sekildi qazaqtyń da nazary Parıjdegi Olımpııa oıyndaryna aýyp otyr. О́ıtkeni Tokıodaǵy básekede elimizdiń sportshylary altyn júlde almaǵannan keıin osy Olımpıadadan úmit kúttik. Tórtjyldyq dodanyń alǵashqy kúni sol úmitimizdi sańlaq dzıýdoshy Eldos Smetov aqtady. Qarsylasynyń bárin jeńip, qazaq dzıýdoshylarynyń arasynan tuńǵysh Olımpıada chempıony atandy. Tatamı tarlanbozynyń bul jeńisi qazaq halqynyń mereıin ósirdi. Kók baıraǵymyzdy jelbiretip, Ánuranymyzdy shyrqatty. Osy sátti teledıdardan kórip, qýanyshtan qatty tolqydym», deıdi A.Jazyqov.
Sol kezde ol Olımpıada chempıonynyń sýretin beıneleý týraly oıǵa bekinipti. Al kóliginiń áınegine salý úshin sirińkeniń taly men maqta taıaqshasyn qoldanǵan.
«Kóligimniń áınegi shań edi. Sony utymdy paıdalanǵym keldi. Sóıtip, Eldostyń portretin sala bastadym. Chempıonnyń sýreti sátti shyqty. Muny kórgen júrgizýshiler de, jaıaý júrginshiler de kóligimdi fotoǵa túsirip alyp júr», deıdi áýesqoı sýretshi.
Eldostyń portreti – alǵashqy týyndysy emes. Baǵdarlamashy mamandyǵyn meńgergen Aslan Jazyqov buǵan deıin de birneshe sportshynyń portretin salypty.
«Buryn Gennadıı Golovkın men Serik Bıbosynovtyń, Shafhat Rahmonovtyń portretin salǵan edim. Al alǵash ret «VAZ-2109» kóliginiń artqy áınegine 2016 jyly Anglııa chempıony atanǵan «Lester sıtı» fýtbol komandasynyń emblemasyn beıneledim. Bul sýretimdi BBC saıty «qazaqstandyq jankúıerdiń týyndysy, biraq avtory belgisiz» dep jarııalady», deıdi A.Jazyqov.
Qazir áýesqoı sýretshiniń úsh balasy bar. Onyń 9 jastaǵy qyzy Darııa dzıýdo seksııasyna qatysyp júr.
Atyraý oblysy