Búgin «Egemen Qazaqstan» gazetinde Memleket basshysy Qasym-Jomart Toqaevtyń «Ortalyq Azııa renessansy: ornyqty damý jáne órkendeý joly» atty maqalasy jaryq kórdi. Onda Prezıdent Ortalyq Azııa elderiniń ortaq damý maqsattary týraly sóz qozǵaǵan, dep habarlaıdy Egemen.kz.
«Ortalyq Azııa aımaǵy san ǵasyrdan beri birtutas geosaıası jáne rýhanı keńistik retinde belgili. Bul – tabıǵı resýrsy men adam kapıtaly mol, mádenı-tarıhı murasy baı óńir. Kóshpeli jáne otyryqshy ómir saltynyń úndestigi mundaǵy sharýashylyq júıeniń negizi bolyp qana qoımaı, aımaqtyń ózindik saıası-quqyqtyq mádenıetin jáne kez kelgen ózgeriske beıimdigimen, tózimdiligimen erekshelenetin qundylyqtar jıyntyǵyn qalyptastyrýǵa yqpal etti. Ortalyq Azııa keńistigi san alýan ımperııanyń qurylǵanyna, ydyraǵanyna, saıası jáne ekonomıkalyq modelderdiń tabıǵı jolmen damyǵanyna kýá boldy, biraq ózine tán biregeıligin saqtap qaldy. Halyqtarymyz ejelden túrli órkenıetpen til tabysyp, qarym-qatynas ornata bildi. Sonyń arqasynda bul aımaq óziniń etnomádenı jáne rýhanı ereksheligin saqtaı otyryp, Uly Jibek jolynyń jáne tutastaı alǵanda úlken Eýrazııanyń tarıhynda sheshýshi ról atqardy», dep jazdy Prezıdent.
Sondaı-aq maqalada damýdyń jańa tarıhı kezeńinde elderimiz kóptegen synaq pen qıyndyqty bastan ótkergeni aıtylady.
«Degenmen Ortalyq Azııa respýblıkalary «qalyptaspaǵan memleketterdiń» qataryna nemese failed states dep atalatyn topqa qosylady degen pessımıstik boljam rastalǵan joq. Aımaqtaǵy elder ózderiniń qalyptasqan derbes memleket ekenin dáleldep, halyqaralyq qaýymdastyqtaǵy laıyqty ornyn aldy. Halyqtarymyzdyń birligi men danalyǵynyń arqasynda biz ózimizdiń aýmaqtyq tutastyǵymyzdy, erkindigimiz ben egemendigimizdi nyǵaıttyq.
Búginde óńirdegi árbir eldiń memlekettik qurylys, naryqtyq ekonomıkany damytý, mádenı murasyn qalpyna keltirý, ulttyq biregeıligin qalyptastyrý isinde ózindik tájirıbesi bar desek, artyq aıtqandyq emes», delingen maqalada.
Budan soń, Memleket basshysy qoǵamdyq jáne memlekettik ınstıtýttar jańǵyrtylǵany jóninde sóz etken.
«Damyǵan ınfraqurylym men ónerkásip jelisi quryldy, myńdaǵan shaqyrym jańa temirjol men avtokólik joly salyndy, mańyzdy áleýmettik nysandar boı kóterdi. Bizdiń ashyqtyq pen jańarý jolyndaǵy baǵytymyz ulttyq ekonomıkalarymyzdyń dáıekti túrde ósýin jáne olardyń álemdik ekonomıkalyq qatynastarǵa yqpaldasýyn qamtamasyz etti. Bilim berý, densaýlyq saqtaý jáne zeınetaqy júıeleriniń josparly damýy halyqtyń áleýmettik-ekonomıkalyq jaǵdaıynyń aıtarlyqtaı jaqsarýyna septigin tıgizdi», delingen Prezıdent maqalasynda.
Maqalanyń tolyq nusqasyn oqý úshin myna siltemege ótińiz.