Senat depýtaty Nurtóre Júsip «Egemen Qazaqstan», «Kazahstanskaıa pravda», «Ana tili», «Baldyrǵan», «Uıǵyr avazı» basylymdaryn biriktiretin «Qazaq gazetteri» JShS-nyń Almatydaǵy fılıalynyń qyzmetkerlerimen kezdesti. Senator dástúrli buqaralyq aqparat quraldaryn transformasııalaý, sóz bostandyǵyn qorǵaý, jýrnalıst mártebesin bekitý jónindegi memlekettik reformalar jáne Parlament qabyldaǵan «Mass-medıa týraly» zańdaǵy ózgerister týraly aıtyp berdi.
Kezdesýge qatysýshylar jýrnalıstıkany damytý, buqaralyq aqparat quraldarynyń jas qyzmetkerlerin, blogerlerdi jáne jańa kezeń jýrnalısterin qoldaý máselelerin talqylady. Nurtóre Júsip qazirgi qoǵamnyń irgetasy sapaly aqparat ekenin atap ótti. Aqparat taratýdyń negizgi quralynyń biri retinde merzimdi baspasóz qoǵamdyq pikir qalyptastyrýda, ózekti oqıǵalardy jarııalaýda mańyzdy ról atqaryp keledi.
«Gazetter men jýrnaldar bilim kózi retinde jáne adam qundylyqtaryn qalyptastyrýda qoǵam ómirinde mańyzy zor. Memleket tıisti zańdardy qabyldaýda jáne otandyq buqaralyq aqparat quraldarynyń damýyn belsendi túrde qoldap keledi. Parlament qabyldaǵan «Mass-medıa týraly» zań – osy joldaǵy mańyzdy qadamnyń biri. Ol buqaralyq aqparat quraldary salasyndaǵy qoldanystaǵy birneshe zańnyń erejelerin biriktirip otyr. Onda memlekettik emes buqaralyq aqparat quraldaryna arnalǵan grant arqyly memlekettik aqparat saıasatyn qarjylandyrýdy jetildirý, suraqtardy qaraý merzimin qysqartý, jýrnalıstiń kásibı qyzmetine quqyqtyq kepildik berý, sondaı-aq buqaralyq aqparat quraldarynyń ózin-ózi retteýi jáne jýrnalıstiń ádep kodeksin ázirleý jónindegi qoǵamdyq-kásibı keńes qurý sııaqty ózgerister bar. Bul zań elimizdiń medıa keńistigin damytýdaǵy mańyzdy qadam bolyp otyr», dedi Nurtóre Júsip.
Taraptar jýrnalısterdi daıarlaý, mamandyq etıkasy jáne jýrnalıstıkada jasandy ıntellektti paıdalaný keleshegi máselelerin de talqylady.