2024 jyldyń 8-13 qyrkúıegi aralyǵynda Astanada 5-shi Dúnıejúzilik kóshpeliler oıyndary ótedi. Jarysqa álemniń 89 elinen 2 myńnan astam sportshy qatysady. Sporttyq jarystar men mádenı is-sharalarǵa 100 myńnan astam týrıst keledi dep josparlanyp otyr, dep habarlaıdy Egemen.kz 5-shi Dúnıejúzilik kóshpeliler oıyndarynyń dıreksııasyna silteme jasap.
Astanada 5-shi Dúnıejúzilik kóshpeliler oıyndarynyń sporttyq baǵdarlamasy aıasynda sporttyń 21 túri boıynsha jarystar ótkizý josparlanǵan.
Olardyń qatarynda at jarysy, ulttyq kúres túrleri, dástúrli zııatkerlik oıyndar, jekpe-jek túrleri boıynsha jarystar, sadaq atý, qustarmen ań aýlaýdyń ulttyq túrleri, at jarystary, halyq oıyndary bar.
Tikeleı Astanada «Kóshpeliler álemi» etnoaýyly ashylady, onda árbir kelýshi qazaq halqynyń mádenıeti men dástúrlerimen, sondaı-aq qatysýshy elderdiń ózindik mádenıetimen tanysa alady.
Kún saıyn etnoaýylǵa elordanyń 10 myńnan astam turǵyny men qonaǵy bara alady. Astanada 5-shi Dúnıejúzilik kóshpeliler oıyndary «Uly Dala dúbiri» uranymen ótedi.
Sonymen qatar 5-shi Dúnıejúzilik kóshpeliler oıyndary aıasynda 9-11 qyrkúıekte Ulttyq mýzeıde «Kóshpeliler: tarıh, bilim, sabaqtar» atty halyqaralyq ǵylymı-praktıkalyq konferensııa ótedi. Konferensııa «Tarıh jáne mádenıet», «Sport ǵylymy» jáne «Ortalyq Azııa kóshpelileriniń tamaqtanýy» seksııalarynan turady.