Qajymuqan men Balýan sholaq atalarymyzdyń izbasary dep sanaıtyn, Qazaq elin tórtkúl dúnıege tanytyp júrgen Sergeı Syrýlnıkov jaqynda álemge áıgili, mıllıondaǵan kórermeni bar Amerıkadaǵy «America's Got Talent» telejobasyna qatysyp, fınalǵa shyqty, dep habarlaıdy Egemen.kz.
Sergeı 1985 jyly Aqmola oblysynyń Shortandy aýdanynda dúnıege kelip, Astanadaǵy Eýrazııa ulttyq ýnıversıtetin tamamdap, áskerı qyzmetin de abyroımen atqardy. Stýdent kezinen bastap, birneshe jyl «Saryarqa» voleıbol klýbynyń múshesi retinde jastardy sportqa baýlýǵa kóp eńbek sińirdi. О́zi de úzdik oıynshy retinde komandanyń quramynda túrli týrnırlerge qatysyp keledi.
Qazaqstan Respýblıkasy Ardager voleıbolshylar federasııasynyń vıse prezıdenti Ersultan Bekturǵanovtyń aıtýynsha, shet memleketterde qazaqtyń ulttyq kıimin kıip, ıyǵyna qasqyr terisin jaýyp shyǵatyn Sergeı Qajymuqan jáne Balýan Sholaq atalarymyzdyń kezinde jylqylarmen, túıelermen, temirlermen, aýyr tastarmen kórsetken, ańyzǵa aınalǵan ádisterin kórermender aldynda qaıtalap, halyqty tań qaldyryp júr.
Memleket basshysynyń azamattardyń salamatty ómir saltyn ustaný talaptaryn qoldaýshy retinde Sergeı Syrýlnıkov «Týǵan jerge qadam basý», «Aýyl» jobalarynyń negizin qalap, keıingi úsh jylda elimizdiń 129 aýylyn óz qarajatyna sport buıymdarymen qamtamasyz etip, eldi mekenderdegi 50 myńnan astam balalarmen kezdesýler ótkizip, olardyń sportqa qyzyǵýshylyǵyn arttyratyn ıgi isti júzege asyrdy.
Sergeı Valerevıch - álemge kúsh atasyn tanytqan batyr, tórt dúrkin Gınness rekordtar kitabyna engen tuńǵysh Qazaqstan azamaty. Sonymen qatar ol mádenıet pen sporttyń resmı Elshisi, «Dostyq», «Qurmet» ordenderiniń, «Qajymuqannyń 145 jyldyǵy», Saǵadat Nurmaǵambetov, Baýyrjan Momyshuly atyndaǵy marapattardyń jáne kóptegen medaldyń ıegeri.