Keshe Qazaqstan Respýblıkasynyń Memlekettik hatshysy Gúlshara Ábdiqalyqova BUU Turǵyn halyq salasyndaǵy (IýNFPA) qorynyń Ortalyq Azııa elderi jónindegi keńsesiniń dırektory Nıkolaı Botevpen kezdesti.
Memlekettik hatshy qordyń Qazaqstan halqynyń turaqty damýy men ál-aýqatynyń artýyndaǵy eleýli úlesin atap ótip, onyń atqaryp jatqan isterine rızashylyǵyn bildirdi. Sizder Qazaqstan aýmaǵynda 1992 jyldan beri qyzmet etip kelesizder.
Osy jyldarda halyq ómiriniń turaqty damýy men ósýine ózderińizdiń úlesterińizdi qosyp, birneshe jobany iske asyrdyńyzdar. Sondaı-aq, sizder oralmandardyń, jastar men jasóspirimderdiń, áıel-analardyń da jaǵdaıyn zertteýdesizder. Sonyń ishinde, birneshe oblysta 13-16 jas aralyǵyndaǵy jasóspirim qyzdarǵa bolashaq áıel-ana retinde ósý men qalyptasýǵa qanshalyqty jaǵdaı baryn qadaǵaladyńyzdar. Ásirese, sońǵy bes jylda júzege asyrǵan jobalaryńyzǵa joǵary baǵa bere alamyz. Eger 2008-2009 jyldary 100 myń adamǵa shaqqandaǵy ana ólimi 36,8 adam bolsa, sizderdiń osy isti zerttep, sonyń arqasynda biz ókimet kómegin uıymdastyrýymyzdyń arqasynda bul san sońǵy jyly 11,5 adamǵa deıin tómendedi. Aldaǵy ýaqytta da osyndaı ıgilikti jumystardy birlese atqaratynymyzdan úmittimiz, dedi G.Ábdiqalyqova. О́zi tarapynan N.Botev Memlekettik hatshyǵa qor jumystaryna joǵary baǵa bergeni úshin rızashylyǵyn bildirdi.
Kezdesýden shyqqan soń N.Botev jýrnalısterge brıfıng berdi. Bizdiń qorymyz Qazaqstan turǵyndary úshin negizgi úsh baǵyt boıynsha jumys isteıdi. Ol halyqtyń ómir sapasy boıynsha qalyptasqan úrdister, ósim dınamıkasy jáne demografııa. Sondaı-aq, ananyń densaýlyǵyn saqtaý, bala óliminiń azaıýy máselelerin de qarastyramyz. Ana densaýlyǵyn saqtaý máselesinde Qazaqstan sońǵy jyldary jaqsy nátıjege jetip keledi. Biz Memlekettik hatshymen aldaǵy ýaqyttaǵy osy baǵyttarda atqaratyn jumystarymyzdy talqyladyq, dedi ol.
Kezdesýge atalmysh qordyń Qazaqstandaǵy atqarýshy ókili R.Sısemálıev, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasary, Ortalyq saılaý komıssııasynyń múshesi L.Súleımen qatysty. L.Súleımen de jýrnalısterge atalmysh qordyń jumystary týraly pikirin bildirdi. Bul qor elimizdiń memlekettik organdarymen tyǵyz baılanysta. Sonyń ishinde Densaýlyq saqtaý jáne áleýmettik damý, Bilim jáne ǵylym mınıstrlikteri, Áıelder isteri jáne otbasylyq-demografııalyq saıasat jónindegi ulttyq komıssııa, Statıstıka agenttikteri bar, dedi ol.
О́tken jyly memlekettik organdar osy qormen birlesip, birneshe jobany tabyspen júzege asyrypty. Sonyń ishinde otbasyn josparlaýdy jaqsartý, áıelder men jastardyń reprodýktıvti densaýlyǵyn qorǵaýdy qamtamasyz etý, oralmandarmen jumys jáne mıgranttar máselesi bar eken.
Memlekettik hatshydaǵy kezdesý qorytyndysy boıynsha aldaǵy ýaqytta da Memleket basshysynyń «Nurly Jol – bolashaqqa bastar jol» atty Joldaýynyń aıasynda halyqtyń áleýmettik turmysynyń kókeıkesti máselelerin birlese sheshý joldaryn jalǵastyrý týraly kelisildi.
Jaqsybaı SAMRAT,
«Egemen Qazaqstan».