Búgin, 10 tamyz – Abaı kúni. 2020 jyldyń 5 tamyzynda Úkimet qaýlysynyń negizinde 10 tamyz «Abaı kúni» dep atalatyn merekelik data bolyp bekitilgen edi, dep habarlaıdy Egemen.kz.
Abaı kúni retinde 10 tamyzdyń belgilenýi beker emes. Ǵylymı ortada oıshyldyń týǵan kúni týraly eki túrli nusqa bolǵanymen, jyldar boıy 10 tamyz resmı túrde Abaı Qunanbaıulynyń týǵan kúni retinde tańbalanyp keldi. Abaıdyń 175 jyldyq mereıtoıy qarsańynda osy data kúntizbege Abaı kúni retinde resmı bekitilgen edi.
179 jyl buryn (1845-1904) – qazaqtyń uly aqyny, fılosof, aǵartýshy, kompozıtor Abaı Qunanbaıuly dúnıege keldi.
Abaı Qunanbaev - qazaqtyń uly aqyny, aǵartýshysy, kompozıtory, qazaq jazba ádebıetiniń negizin qalaýshy. Qazaqstandyqtar onyń poemalary, óleńderi men aýdarmalarymen bala kezinen tanys. Abaı óziniń maǵynasy tereń jáne tili baı shyǵarmalarynda adamdardy eńbekke, bilimge, rýhanı damýǵa shaqyrdy. Abaıdyń progressıvti kózqarastary búginde erekshe ózektilikke ıe, óıtkeni onyń ıdeıalaryna gýmanıstik jáne aǵartýshylyq sıpattar tán.
Abaı 170-ke jýyq óleń, poema men "qara sózderin" jazyp, 56 aýdarma jasady. Onyń aýdarmalarynyń arqasynda álemdik ádebıet klassıkteriniń shyǵarmalaryn qazaq tilinde oqýǵa múmkindik týdy.