Búgin Ǵylym jáne joǵary bilim mınıstrligi magıstratýraǵa túsýge arnalǵan keshendi testileýdiń nátıjelerin jarııalady, dep habarlaıdy Egemen.kz.
Mınıstrliktiń habarlaýynsha, ǵylymı-pedagogıkalyq baǵyt boıynsha magıstratýraǵa túsý úshin keminde 75 ball, beıindik baǵyt boıynsha keminde 30 ball jınaý qajet.
«Grant konkýrsyna qujattardy qabyldaý 12-15 tamyz aralyǵynda júzege asyrylady, al grant ıegerleriniń tizimi 25 tamyzǵa deıin jarııalanady», delingen habarlamada.
Aıta keteıik, magıstratýraǵa túsýge arnalǵan keshendi testileýdi 39 myńnan astam adam tapsyrǵan. Olardyń 43%-y shekti ball jınaǵan. Ortasha kórsetkish – 75 , al eń joǵary ball – 132 ball boldy.
Bıyl elimizde magıstratýrada oqýǵa 13 myń grant bólindi.
«Testileý qorytyndysy boıynsha 149 qatysýshynyń nátıjesi joıyldy. Onyń ishinde 101 oqýǵa túsýshi smartfon, shpargalka jáne basqa da tyıym salynǵan zattardy alyp ótýge tyrysqany úshin test tapsyrý múmkindiginen aıyryldy. Keshendi testileý kezinde erejelerdi buzǵany úshin aýdıtorııadan 41 adam shyǵarylyp, olardyń nátıjeleri joıyldy. Keshendi testileýge kirgizýdiń úsh deńgeıli júıesiniń arqasynda 3 bógde tulǵa anyqtaldy. Sondaı-aq testileý beınejazbalaryn qaıta tekserý nátıjesinde 4 adamnyń baly joıyldy. Atap ótsek, ereje buzýshylyq ótken jylmen salystyrǵanda (2023 jyly – 281) shamamen eki esege azaıdy», dep habarlady Ǵylym jáne joǵary bilim mınıstrliginiń baspasóz qyzmeti.
Grant konkýrsyna qatysý úshin úmitkerler kelesi qujattardy tapsyrý qajet:
jeke kýáliktiń kóshirmesi; joǵary bilimi týraly qujat (dıplom jáne qosymshasy); KT sertıfıkaty; halyqaralyq sertıfıkattar (bar bolǵan jaǵdaıda).Qujattardy oqý ornyna qabyldaý komıssııalaryna oflaın, sondaı-aq vırtýaldy qabyldaý komıssııalary arqyly onlaın tapsyrýǵa bolady.