Májilis depýtattarynyń óńirlerdegi jumysy jalǵasyp keledi. Búgin «AMANAT» partııasy fraksııasynyń múshesi Bolat Kerimbek Taldyqorǵandaǵy Ortalyq stadıonnyń rekonstrýksııa barysymen tanysyp, oblystyń sport qoǵamdastyǵymen kezdesti, dep habarlaıdy Egemen.kz.
Taldyqorǵan Ortalyq stadıony qaıta jańartylǵannan keıin 1500 kórermendi qabyldaı alady, bul burynǵydan 500 orynǵa artyq. Jańartylǵan alańda «Jetisý» fýtbol klýbynyń 400-den astam tárbıelenýshisi jattyǵýlaryn jalǵastyra alady. Al alǵashqy fýtbol matchy 18 tamyzda ótedi.– Jurtshylyq árqashan sportqa erekshe kóńil bóledi. Oǵan ásirese jaqynda ótken Olımpıada oıyndary da sep boldy. Bolashaqta elimizdi úlken sportta jarqyn jeńister kútip turǵanyna senimdimin. Memleket pen «AMANAT» partııasy barlyq qala men aýylda dene shynyqtyrý jáne sportpen shuǵyldaný úshin jaǵdaı jasaýǵa kúsh salyp jatyr. Qazir «Jetisý» fýtbol klýbynda jattyǵyp júrgen balalardyń ishinen bolashaqta álemdik deńgeıdegi juldyzdar ósip shyǵýy ábden múmkin, – dedi Bolat Kerimbek.
Sportshylarmen kezdesýde depýtat partııanyń kásibı jáne buqaralyq sportty damytý, sondaı-aq salaýatty ómir saltyn nasıhattaý jónindegi basymdyqtary týraly aıtty. Qazirgi ýaqytta Májilistiń áleýmettik-mádenı damý komıtetinde dene shynyqtyrý jáne sport máseleleri týraly zań jobasy qaralyp jatyr. Eger qazir Qazaqstanda 180 sport túri damyǵan bolsa, endi Olımpıada, Paralımpıada, Sýrdlımpıada, Azııa jáne Paraazııalyq oıyndar baǵdarlamasyna engizilgen sport túrlerine basymdyq beriledi. Sonymen qatar zań jobasy sport rezervin daıyndaýdy jetildirýge baǵyttalǵan, ol úshin ulttyq sporttyq daıarlyq standarttary ázirlenip, bekitiledi.
Memleket pen partııa óńirlerde buqaralyq sportty damytýǵa erekshe nazar aýdarady. Máselen, ótken jyly «AMANAT» partııasynyń Jetisý oblysy boıynsha saılaýaldy baǵdarlamasy aıasynda Basshı jáne Shanhanaı aýyldarynda kúres zaldary, Kerbulaq aýdany Saryózek aýylyndaǵy ortalyq stadıon, Alakól aýdanynyń Beskól aýylynda, Panfılov aýdanynyń Penjim jáne Úlken Shyǵan aýyldarynda, Qaratal aýdanynyń Kálpe jáne Eskeldi aýdanynyń Kókjazyq aýyldarynda sport keshenderi paıdalanýǵa berildi. Sarqan qalasynda jabyq fýtbol maneji salynyp, ortalyq stadıon jańartyldy.