Aqtóbede Aqmola oblysynyń eki turǵyny quny 15 mıllıon teńgeden asatyn transformatorlardy urlap, Qyrǵyzstan azamattaryna satyp jibergen, dep habarlaıdy Egemen.kz.
Polıseıler qurylys nysandarynyń aýmaǵynan toǵyz qýat transformatoryn urlady degen kúdikpen Aqmola oblysynyń eki turǵynyn ustaǵan.
«Kúdiktiler transformatorlardy manıpýlıatorǵa tıep alyp ketken. Kóp uzamaı Qaraǵandy qalasyna jetkizip, kórshi eldiń azamattaryna satyp jibergen. Keltirilgen shyǵyn kólemi 15 mln teńgeden asady», dep habarlady Aqtóbe oblystyq PD.
Anyqtalǵandaı, urlanǵan transformatorlar tıelgen júk kóligin jedel qyzmetkerler Qyrǵyzstan Respýblıkasymen shekaralas jerde toqtatqan.
Urlyq faktisi boıynsha sotqa deıingi tergeý amaldary júrgizilip jatyr. Eki kúdikti ýaqytsha ustaý ızolıatoryna qamaldy.