Klýb degende sahnasynda ártisterdiń konserti men ákimderdiń jınalysy ótetin aýyldaǵy kádimgi klýb eken dep qalmańyz. Bul jolǵy saýdaǵa fýtbol klýby túsip jatyr. Iаǵnı, Jambyl oblysyndaǵy sport salasynyń basshylary teńbil dopqa teńge jumsaıtyn qaltasy qalyń azamattardy izdeýde. Naqtyraq aıtqanda, elimizdiń birinshi lıgasynda óner kórsetetin «Lashyn» komandasy 520 myń teńgege satylǵaly jatyr. Bul saýdaǵa qyzyqqan kez kelgen úmitker klýbtyń qojaıyny bola alady.
Oblystyq deneshynyqtyrý jáne sport basqarmasynyń basshysy Gamlet Qaınarbekovtiń aıtýyna qaraǵanda, klýbty satyp alý ońaı, biraq, ony kerek-jaraqpen qamtamasyz etý, túrli deńgeıdegi jarystarǵa shyǵaryp, oıynshylar men jattyqtyrýshylardyń jalaqysyn tóleý úlken mashaqat. Ázirge bul shyǵyndarǵa oblystyq bıýdjetten jyl saıyn 100-120 mln. teńge kóleminde qarjy bólinip keledi. Aıta ketý kerek, «Lashyn» klýby osydan bes jyl buryn Taraz qalasynda qurylǵan bolatyn. Alaıda, bir jyldan keıin Qarataý qalasyna kóshirildi. Komanda jylda birinshi lıgadaǵy oıyndarǵa turaqty túrde qatysyp keledi. Byltyrǵy maýsymda 27 upaı jınap, 15 komandanyń ishinde 11-shi oryn alǵan bolatyn.
Sóıtip, memlekettik kásiporyndardy básekelik ortaǵa shyǵarý tártibi boıynsha «Lashyn» fýtbol klýbyna konkýrs ótipti. Biraq eshkim qyzyǵýshylyq tanytpaǵan...
Oralhan DÁÝIT,
«Egemen Qazaqstan».
Jambyl oblysy.