Jamby atýdan ulttyq quramamyz V Dúnıejúzilik kóshpeliler oıyndarynda el namysyn qorǵaıtyn úzdikter anyqtalyp, jattyǵý jıynyn ótkizip jatyr. Úzdik shyqqan 10 jamby atýshy kóshpeliler oıyndaryna tikeleı joldama beretin 3 oryndy sarapqa salyp, irikteý oıyndaryna qatysty.
Mergenderimiz «Majar», «Azııa», «Túrki», «Jamby» stılderi boıynsha baq synady. Jalpy esepti qorytyndylaı kele, 1-oryndy Aıtbek Sarybaı, 2-oryndy Abzal Tulybekov, al sońǵy joldamany Eralhan Aıkóz oljalady. Al álem chempıony Batyr Beksaýyt kóshpeliler oıyndaryna tikeleı joldama alǵandyqtan irikteýge qatysqan joq.
«Mergenderdiń sheberligin synaý saıysy óte tartysty ótti. Al endi biz aldaǵy V Dúnıejúzilik kóshpeliler oıyndarynda altyn medal oljalap, chempıon ataný úshin barymyzdy salamyz. El namysyn abyroımen qorǵaýǵa ýáde beremin», dedi jamby atýdan ulttyq qurama múshesi Eralhan Aıkóz.
Eralhan – 2021 jyly Irannyń Tegeran qalasynda ótken XVI álem chempıonatynyń jeńimpazy jáne kúmis júldegeri. Jamby atýdan úmit artar ekinshi sańlaq Batyr Beksaýyt 2021 jyly jastar arasyndaǵy el chempıonatynda top jaryp, Shymkentte ótken Azııa chempıonatynyń altyn jáne qola júldegeri atandy. Qytaıda ótken álem chempıonatynyń altyn jáne qola júldesin enshiledi. Aıtbek Sarybaı 2019 jyly Ońtústik Koreıada ótken XV álem chempıonatynyń jeńimpazy jáne qola júldesin ıelendi, Qytaıda uıymdastyrylǵan álem chempıonatynyń kúmis medalin oljalady. Abzal Turlybekov 2018 jyly jamby atýdan álem chempıonatynda jeńiske jetti.
Jamby atýshylardyń Alataý bókterinde bastalǵan oqý-jattyǵý jıyny 18 tamyzǵa deıin jalǵasady. Mergenderdiń alańsyz daıyndalýyn Týrızm jáne sport mınıstrliginiń Ulttyq jáne at sporty túrleri ortalyǵy uıymdastyryp otyr.
«Ázirlik óz deńgeıinde júrip jatyr. Áli kem-ketikti bútindeıtin tusymyz bar. Kóshpeliler oıyndaryna 4 sportshymyz joldama aldy. Dúnıejúzilik kóshpeliler oıyndary ulttyq sporttyń olımpıadasy desek te bolady. Sondyqtan da buǵan tańdaýly mergender qatysady», dedi ulttyq quramanyń bas bapkeri Eldos Badashev.
Mergender sońǵy oqý-jattyǵý jıynyn 27 tamyz ben 7 qyrkúıek aralyǵynda Astanada ótkizedi.
Atqa miný dástúri jalǵasty
Elorda tórin dúbirge bóleıtin Dúnıejúzilik kóshpeliler oıyndarynyń qarsańynda aıtýly dodany qoldaý maqsatynda túrli is-sharalar uıymdastyrylyp jatyr. Sonyń biri «Atqa miný dástúri» chellendji Astana mańyndaǵy «Arǵymaq» at-sporttyq saýyqtyrý kesheninde jalǵasyn tapty. «Birlik kerýeni» jobasynyń aıasynda qurylǵan elordalyq elshiler atalǵan chellendjge qatysyp, atqa qonyp, seıil qurdy.
Elimizde tuńǵysh ret ótetin Dúnıejúzilik kóshpeliler oıyndaryn qoldap, halyq arasynda nasıhattaýdy qolǵa alǵan elshiler osy is-sharany uıymdastyrdy. Elshilermen birge Ulttyq at sporty federasııasy men Ulttyq sport túrleri qaýymdastyǵynyń negizin qalaýshylardyń biri, «Atbegiler men shabandozdar» uıymynyń tóraǵasy, Ulttyq sport túrlerinen eńbek sińirgen jattyqtyrýshy, jazýshy-pýblısıst Sádibek Túgel chellendjge qatysyp, batasyn berdi. Etnosport alamanyn nasıhattaıtyn is-sharaǵa Astana qalasy Dene shynyqtyrý jáne sport basqarmasyna qarasty mekeme qyzmetkerleri jáne belgili sportshylar qatysty.
«Birlik kerýeni» jobasy elimizdiń barlyq aımaǵynda ótkizilip jatyr. Astana qalasynyń bir top elshisi buǵan deıin kókpardan ótken sheberlik sabaǵyna da qatysty.