PETROPAVL. 22 qańtar. Oblystyq tabıǵı monopolııalardy retteý jáne básekelestikti qorǵaý jónindegi departamenttiń basshylyǵy «Petropavl jylý jelileri» JShS-niń jylýdyń baǵasyn ósirý is-áreketiniń zańsyzdyǵy jaıly málimdeme taratty. Bul týraly egemen.kz tilshisi habarlady.
Atalmysh mekeme jylý qýatyn berý jáne taratýdyń retteletin qyzmet túri boıynsha tabıǵı monopolııalardyń sýbektisi retinde 2014 jyly 1 sáýirde departamentke 2 jyldyq tarıf smetasyn bekitý týraly ótinim túsirgen. Alaıda, osy jyly 12 maýsymda qabyldanǵan «Tabıǵı monopolııalar jáne retteletin rynoktar týraly» Zańǵa sáıkes, tabıǵı monopolııa sýbektisiniń mindetteri ózgertilip, «Tabıǵı monopolııalar sýbektisi 5 jáne odan da kóp jylǵa deıingi araqashyqtyqpen uzaqmerzimdi kezeńge ókiletti organ bekitken aqyrǵy tarıfter (alymdar baǵasy, stavkalary) deńgeıi boıynsha retteletin qyzmet kórsetýge mindetti» degen jańa bap engizilgen. Zańnama talaptaryn basshylyqqa alǵan departament 2014 jylǵy 16 shildede «Petropavl jylý jelileri» JShS-niń ekijyldyq merzimge jylý qýatyn berý jáne taratýǵa arnalǵan qyzmet tarıfin jáne tarıf smetasyn bekitýden bas tartqan. Bul sheshimmen kelispegen «Petropavl jylý jelileri» JShS oblystyq mamandandyrylǵan aýdanaralyq ekonomıkalyq sotqa shaǵym túsirgen. Alaıda, mekemeniń aryzy qanaǵattandyrylmaǵan. Budan keıin seriktestik bıyl qańtarda azamattyq jáne ákimshilik ister jónindegi apellıasııalyq sot alqasyna júgingenimen, burynǵy sheshim ózgerissiz qaldyryldy.
О́mir Esqalı.
Derek: egemen.kz.