Almaty oblysynda akvaósirý óndirisin osy jyly 6 myń tonnaǵa, al 2030 jylǵa qaraı 20 myń tonnaǵa jetkizý josparlanyp otyr. Búginde oblys kóleminde 30-dan astam balyq ósirý sharýashylyǵy turaqty túrde jumys istep keledi. Keıingi ýaqytta olardyń qatary jańa balyq sharýashylyqtarymen tolyǵyp jatyr.
Oblys balyq sharýashylyǵyn respýblıkalyq deńgeıde damytý boıynsha kóshbasshylar sanatynda. Memleket tarapynan da balyq sharýashylyǵynyń damýyna sýbsıdııa retinde qoldaý kórsetiledi. Nátıjesinde, azyqqa, shabaqqa, dári-dármekke jáne ınvestısııalyq salymdar úshin sýbsıdııalaýǵa jyl saıyn qyrýar qarajat bólinedi.
«Mysaly, byltyr balyq sharýashylyǵyn sýbsıdııalaýǵa 150 mln teńge bólindi. Bul qarajat tolyǵymen ıgerilip, bıylǵa arnalǵan akvaósirý óniminiń ónimdiligi men sapasyn arttyrýda, sondaı-aq asyl tuqymdy balyq ósirýdi damytýǵa sýbsıdııalaý kólemi 300 mln teńge bolyp bekitildi. Qazirgi ýaqytta «Kezekte» aqparattyq júıeler platformasyndaǵy «Balyqsy» servısi arqyly túsken 46 ótinim boıynsha 116,4 mln teńge tólendi. Bıyl balyq sharýashylyǵyna ınvestısııalyq salymdardy sýbsıdııalaýǵa jergilikti bıýdjetten 500 mln teńge bólinip, qazir ótinimder qabyldaý jumystary júrgizilip jatyr», deıdi Almaty oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Qanat Núsipbaev.
Sonymen qatar «Aýyl amanaty» jobasy boıynsha aýyl turǵyndary óz bıznesin damytýǵa nemese kooperatıv quramynda jeńildetilgen nesıe ala alatyny, sondaı-aq tehnıkany lızıngke resimdeýge bolatyny aıtyldy.
О́ńirde balyq sharýashylyǵyn damytýǵa súbeli úles qosyp júrgen kásipker Marlen Tursynáli jýyrda Eńbekshiqazaq aýdanyna qarasty Esik ózeniniń boıynan ekinshi sharýashylyǵyn ashyp, sýy tunyq basseınge alǵashqy shabaqtardy jiberdi. Shamamen 1 mln dollar kóleminde ınvestısııa salynǵan jobanyń jyldyq qýattylyǵy 500 tonna bolmaq. Osylaısha, kásip ıesi taý qoınaýyndaǵy basseınde forel tuqymyn ósirýge bel baılap otyr. «Aller Aqua Polska» kompanııasymen tikeleı baılanys jasap, jeti balyq sharýashylyǵyn ashqan «TMT Group» JShS basshysy Marlen Tursynáli balyqta bereke baryn aıtady.
«Aǵyndy sýdyń arnasynda ósetin balyqtyń dámdi bolatynyn tutynýshylar biledi. Balyqtyń adam organızmine paıdasy óte zor. Balyq taǵamdarynyń quramy mıkroelementter men dárýmenge baı ári berekeli bolady. Sondyqtan balyq pen teńiz ónimderine suranys artpasa, kemigen emes», deıdi isin ilgeriletip otyrǵan kásipker.
Esik ózeniniń boıynan ashylǵan balyq sharýashylyǵyna jiberilgen úsh aılyq shabaqtar alty aıdan soń salmaǵy 300-400 gr balyq bolyp, baılyq kózine aınalmaq.
Almaty oblysy