El astanasynda Halyqaralyq jastar kúnine oraı «Bir tolqynda» zamanaýı bı chempıonaty ótti. «Amanat» partııasy janyndaǵy «Jastar rýhy» jastar qanaty Astana qalasy ákimdiginiń «Bı sporty damýynyń ulttyq odaǵy» RQB qoldaýymen ótkizilgen is-sharada alty memlekettiń ónerli jastary baq synady. О́ner dodasy bıyl ekinshi ret uıymdastyrylyp otyr.
«Jastar rýhy» jastar qanatynyń tóraǵasy Aqerke Eskendirovanyń aıtýynsha, atalǵan joba jastar arasynda salamatty ómir saltyn nasıhattap, sýbmádenıet ókilderine qoldaý kórsetý jáne jastardyń bos ýaqytyn tıimdi paıdalanýyna jaǵdaı jasaýdy maqsat etedi. Eki kúnge sozylǵan chempıonatta elimizdiń túkpir-túkpirinen, sondaı-aq kórshiles memleketterden arnaıy kelgen tanymal ujymdar men bıshiler, sondaı-aq jas talanttar óner jarystyrǵan.
Bı dodasyna Japonııanyń Waacking bıshisi, Asian waacking sensetion jetekshisi, World of Dance World Final fınalısi, Srowd FAVORITE syılyǵynyń ıegeri Mizuki Jane Flamingo, Belgııanyń hıp-hop bıshisi, 2022 jylǵy jazǵy festıvaldyń jáne jahandyq kóptegen bı jarysynyń jeńimpazy Alex the Cage, sonymen qatar koreıalyq Popping bıshisi, Lineup 9 judge fınalısi Firebac arnaıy tórelik etip, ádil baǵasyn berdi. Sondaı-aq olar chempıonat aıasynda sheberlik saǵattaryn ótkizip, tájirıbelerimen bólisti.
Japon bıshisi, tóreshi Mizuki Jane Flamingo óner jarysy asa tartysty ótkenin aıtty. «Qazaqstanǵa alǵash ret kelip otyrmyn. Uıymdastyrýshylar óte jyly qarsy aldy. Eki kún boıy túrli atalym boıynsha synǵa túsken talantty bıshilerdiń tartysty básekesine kýá boldyq. Shynymdy aıtsam, daryndy jastar arasynan jeńimpazdardy anyqtaý qıynǵa soqty», dedi ol.
300-den astam ónerpaz synǵa túsken chempıonatta jeti atalym boıynsha úzdik ónerpazdar aıqyndaldy. Atap aıtsaq, Hip-Hop 2x2 Begginers – Amalııa men Estel, Hip-Hop 1h1 Male – Overhitz, Hip-Hop 1h1 Female – Nursaya, Popping 2x2 Pro – Sss&VV, Waacking 2x2 Pro – Yumetaurus, Waacking 2x2 Beginners – Kchaý Arýana & Nursáýle, All Styles 5x5 Rep Your Country – О́zbekstan komandasy jeńiske jetti.
Aıta keteıik, sońǵy atalym boıynsha Japonııa, О́zbekstan, Qazaqstan elderiniń bıshileri óner jarystyrdy. Oǵan qosa Qazaqstan, О́zbekstan, Qytaı, Japonııa memleketteriniń bıshileri ózge de atalymdar boıynsha baq synady.
Úzdikterge arnaıy syılyqtar men dıplomdar tabystaldy.
Eske salsaq, atalǵan chempıonat byltyr «Esirtkige jol joq» jobasy aıasynda ótse, bıyl V Dúnıejúzilik kóshpeliler oıyndary aıasynda uıymdastyryldy.
Byltyrǵy dodada oza shapqan О́zbekstan komandasynyń múshesi Vladımır Meshcherıakov bıyl All Styles 5x5 Rep Your Country atalymynda baq synaý úshin komandamen kelgen.
«El namysyn qorǵap, jeńimpaz atanǵanymyzǵa qýanyshtymyz. Japonııa men Qazaqstan bıshilerimen synǵa túsip, jeńiske jetý ońaı bolmady. Barlyǵy myqty qarsylastar», dedi ol.