Astanada «Digital Kazakhstan: jańa zamandaǵy bilim» taqyrybynda pedagogterdiń qalalyq tamyz keńesi ótti. 2 myń ustazdyń basyn qosqan jıynnyń basty maqsaty – bilim salasyn sıfrlandyrý men jasandy ıntellekt tehnologııalarynyń ozyq úlgilerin engizý. Bilim oshaqtarynyń basqa da ózekti máseleleri de nazardan tys qalmady.
Pedagog qyzmetkerlerine arnalǵan tamyz keńesi – jańa oqý jylynyń bastalýyna oraı jyl saıyn uıymdastyrylatyn dástúrli is-shara.
Astana qalasynyń ákimi Jeńis Qasymbektiń aıtýynsha, qala turǵyndarynyń jyl saıynǵy ósimin eskere otyryp, elordada birneshe mektep salynyp jatyr. Statıstıkaǵa súıensek, bas qalada jylyna 35 myń bala dúnıege keledi. Búgingi sábı – erteńgi oqýshy. Sondyqtan olardy jaıly mekteppen qamtý – ózekti másele.
«Qazirgi ýaqytta eki aýysymda 100 myń oqýshyǵa arnalǵan 30-dan astam mekteptiń qurylysy júrip jatyr. Jańa oqý jyly ishinde 20-dan astam mektep ashamyz. Olardyń bir bóligi — «Jaıly mektepter». Memleket basshysynyń tapsyrmasymen «Jaıly mektep» ulttyq jobasy aıasynda «Samruk-Kazyna Construction» 2024–2025 jyldar aralyǵynda 90 myń oqýshyǵa arnalǵan 24 mektep salady. Jaýapty mınıstrlikpen, ýnıversıtettermen, ınvestorlarmen birlesip, jataqhanalarda oryn sanyn arttyrý boıynsha jumys isteımiz. Bıyl Astanada 4,5 myń orynǵa arnalǵan 6 stýdenttik jataqhana salynady. Taǵy 4 ýnıversıtetke jataqhana salý úshin jer telimi bólindi. 2025 jyly taǵy 2 jataqhanany paıdalanýǵa berý josparlanyp otyr. Osy is-sharanyń barlyǵy oqýshylarymyz ben ustazdarymyzdy qoldaýǵa baǵyttalǵan», dedi elorda basshysy.
Buǵan qosa jıynda Oqý-aǵartý mınıstri Ǵanı Beısembaev bilim salasyna salynǵan ınvestısııa kólemi jyl ótken saıyn artyp kele jatqanyn aıtty.
«Adam ómirindegi sarqylmas qazyna – bilim men tárbıe. Al ony beretin ustaz. Sondyqtan da bizdiń pedagogter Memleket basshysynyń únemi qoldaýy men qamqorlyǵyn kórip otyr. 2019 jyly «Pedagog mártebesi týraly» zań qabyldanyp, «Qazaqstannyń eńbek sińirgen ustazy» memlekettik nagradasymen 46 muǵalim marapattalsa, «Úzdik pedagog» ataǵyn 668 áriptesimiz ıelendi. Al tórt jylda ustazdardyń jalaqysy eki esege artty. Sondaı-aq keıingi bes jylda bilim bıýdjeti eki esege, al ınvestısııalar kólemi alty esege ósti. Astana qalasynda balabaqsha tapshylyǵyn baıqap otyrmyz. Búgingi tańda 2–6 jasqa deıingi balalardy qamtý 81 paıyz. Bul baǵytta qala ákimdigi aýqymdy jumys atqaryp jatyr. 2025 jylǵa deıin birinshi ret 10 balabaqsha salý josparlanǵan. Bul – orasan zor jetistik. Áleýmettik osal topqa jatatyn otbasyndaǵy 97 myń bala tegin tamaqpen qamtamasyz etildi. Onyń 11 712-si elorda balabaqshalaryna tıesili», dedi mınıstr.