Jańa oqý jyly jaqyndaǵan saıyn oqýshyny mektepke daıyndaý jumystary qyza túsken. Ata-ana men ustazdar úshin naǵyz qarbalas shaq. Osy oraıda áleýmettik jaǵdaıy ártúrli sanattaǵy otbasylardyń balalaryna qoldaý kórsetetin «Mektepke jol» aksııasy bıyl da jalǵasyn tapty. Bul is-sharadan shalǵaıdaǵy aýyldardyń oqýshylary da shet qalmaı, meıirimdi de qaıyrymdy jandardyń qamqorlyǵyn sezinýi qýantady. Solardyń qatarynda Kegen aýdanynyń Tuıyq orta mektebi men oqýshy sany júzge jetpeıtin Jalaýly orta mektepterinde jarqyn ister júzege asyp jatyr.
«Qaıyrymdylyq jasasań, qaıyryn óziń kóresiń» deıdi dana halqymyz. Sanany naryq bılegen zamanda júregi keń, jany jomart adamdardyń bary jandy jadyratady, bolashaqqa úmit syılaıdy. «Bala qýansa, álem qýanady» demekshi, Jalaýly orta mektebiniń dırektory Aıbol Tursynbekulynyń uıytqy bolýymen «Mektepke jol» qaıyrymdylyq aksııasy dástúrli jalǵasyn tapty. Aksııanyń maqsaty – jańa oqý jylyna daıyndyq ýaqytynda az qamtylǵan jáne kópbalaly otbasylardan shyqqan oqýshylarǵa qoldaý kórsetý, oqýǵa yntalandyrý. Osy tusta mektebimizge meıirim-shapaǵatyn tıgizip júrgen atymtaı jomart azamattarǵa, atap aıtqanda aýdannyń aǵartý salasyna súbeli eńbek sińirip, ulaǵatty urpaq ósirgen Ádilhan Zyqaev atamyzdyń qyzy, «Ashadan» qoǵamdyq qorynyń tóraǵasy Lena Baıseıitova men uldary, ekonomıka ǵylymdarynyń doktory Býlan Ádilhanuly men aýylsharýashylyq salasynyń qyzmetkeri, kásipker Nurlan Ádilhanulyna alǵysymyz zor», deıdi Jalaýly orta mektebiniń tárbıe isi jónindegi orynbasary Quralaı Eminaqynova.
Asqar taý ákeniń parasattylyǵymen qosa, keń peıili men izgilikke toly iz qaldyrý syndy asyl qasıetterin sińirgen urpaqtary qaıyrymdylyq jasaýǵa asyǵyp, Jalaýly aýylyndaǵy uıadaı mekteptiń oqýshylaryna «Mektepke jol» aksııasy aıasynda 100 oqýshyǵa mektep formasy, sporttyq kıimder men aıaqkıimder, bastaýysh synyp oqýshylaryna oqý quraldary men mektep sómkesin, soǵan qosa 25 kompıýterdi syıǵa tartqan.
Sondaı-aq byltyr mektep bitirgenderine 20 jyl tolǵan túlekter týǵan jerge týyn tigip, izderinen ilesken ini-qaryndastaryn qýantý maqsatynda mekteptiń 5 oqýshysyna «Baldáýren» jazdyq lagerine joldama berip, jomarttyq jasaǵandyǵyn ataý lázim.
Yntymaq pen birliktiń, tynymsyz tirliktiń uıytqysyna aınalǵan Tuıyq aýylynda da aýyz toltyryp aıtarlyq izgi ister az emes. Ásirese alaqandaı aýyldyń balalaryna bilim nárin sińirip, úlken ómirge qanat qaqtyryp otyrǵan altyn uıa mektebine qolushyn berip, qamqorlyq jasaýdy qaltaly perzentteri umytpaǵan. Shalǵaıda ornalasqan aýyldyq mektepten bilimdi de bilikti ustazdardyń sharapatymen myńdaǵan shákirt bilim alyp, qazirgi tańda ár salada jemisti eńbek etip júr. Aýyldan alystap ketse de, tamyry aýylda jatqan qazaq balasy ózderi túlep ushqan mektepterine, sol jerde bilim alyp jatqan jas urpaqtyń sapaly bilim alýyna jyl saıyn «Mektepke jol» aksııasy aıasynda qomaqty úles qosýdy dástúrge aınaldyrǵan.
«Búginde Tuıyq orta mektebinde 186 oqýshy sanaly tárbıe, sapaly bilim alýda. Bıylǵy jańa oqý jylynda 1-synypqa 11 bala qabyldansa, 18 oqýshy 11-synypty bitiredi. Osy oqýshylardyń tolyqqandy bilim alýyna qajet materıaldyq-tehnıkalyq bazany jaqsartýǵa keń peıil kásipkerler kómek kórsetip, óskeleń urpaqqa úlgi-ónege bolyp otyr. Atap aıtar bolsaq, 2023–2024 oqý jylynda «BTS» JShS bas dırektory Maǵaýııa Qyzaıbaıuly mektepke matematıka kabınetin ashyp berdi. Kabınetti tolyqtaı zamanaýı talapqa saı jabdyqtap, jóndeý jumystarymen árlendirip, kórnekilikter, dıdaktıkalyq materıaldar jáne paneldik taqta, jıhaz, parta-oryndyqtarmen tolyq qamtamasyz etti. Oqýshylardyń matematıka pánine yntalandyrý maqsatynda 5–7 synyp oqýshylar arasynda jyl saıyn «Qyzaıbaı Ysqaquly» atynda olımpıada ótkizýdi josparlap, birinshi olımpıada qorytyndysymen úzdik tanylǵan 3 oqýshy aı saıyn 25000 teńgeden jyl boıy stıpendııa alyp otyr. Al aldaǵy 2024–2025 oqý jylynda «ArhInjProekt» JShS jetekshisi Dýman Abaıuly mekteptiń sport zalyna qajetti qural-jabdyqtarmen tolyqtaı qamtamasyz etip otyr», deıdi Tuıyq orta mektebiniń dırektory Merýert Áýbákirqyzy.
Iá, óndiris oshaǵy joq, aldyna salyp baqqan taı-tuıaǵyn kúnkóris kózine aınaldyryp otyrǵan eldi meken turǵyndaryna osyndaı ýaqytta qolushyn berip, qamqorlyq, meıirimdilik tanytý – azamattyq is der edik. «Meıirimdilik – júrekten» jobasy boıynsha aýdannyń birqatar mektebinde demeýshilerdiń kómegimen oqýshylardy qural-jabdyqpen qamtamasyz etý jumystary jalǵasty. Bul oraıda, mektep muǵalimderiniń de óz qaltalarynan qarjy jınap, áleýmettik jaǵdaıy tómen oqýshylaryna qamqorlyq kórsetip otyrǵan úlken júrek ıeleri ekenin aıryqsha ataý oryndy.
Atap aıtsaq, I.Jumaǵulov, S.Serkebaev, K.Nurpeıisov atyndaǵy, Bóleksaz, Aqsaı, Taldy, Beskól, Qarabulaq aýyldaryndaǵy orta mektepterde muǵalimderdiń jáne jeke demeýshilerdiń kómegimen mektep jasyndaǵy balalarǵa sporttyq kıimder, mektep formasy, oqý quraldary alynǵan. Tasashy orta mektebi janyndaǵy ınternatta oqıtyn 54 balaǵa jeke kásipker Aıaýlym Baýyrjanqyzy 216 000 teńgege oqý quraldaryn satyp alyp qoıǵan. Sondaı-aq Maıly Ormanov mektebiniń oqýshysyna da jeke kásipker qolushyn berip, kerek-jaraqpen qamtamasyz etken. Sonymen qatar jaqsylyq jasaýǵa asyqqan mektep túlekteri A.Núsipbekov atyndaǵy orta mekteptiń 25 oqýshysyna, J.Ermegııaev atyndaǵy orta mekteptiń 15 oqýshysyna, Qarqara orta mektebinde 1-synypqa keletin 17 balaǵa mektep formasy men oqý-quraldaryn alyp qýantqan.
Jalpy, Kegen aýdany boıynsha 1 balaǵa shaqqandaǵy 43 407 teńgeden bólingen memlekettik járdem 880 oqýshynyń ata-anasynyń esepshotyna aýdarylyp, oǵan mektep formalary alynǵan.
Almaty oblysy,
Kegen aýdany