Májilis depýtaty, "Aýyl" partııasy fraksııasynyń múshesi Anas Baqqojaev Atyraý oblysyna sapary aıasynda Mahambet aýdanynyń aýyl sharýashylyǵy mamandarymen jáne sharýalarmen kezdesti, dep habarlaıdy Egemen.kz aqparat agenttigi.
Depýtat kóktemgi sý tasqynynan keıingi Mahambet aýdany turǵyndarynyń úıleri men sharýashylyqtarynyń jaı-kúıimen tanysty. Ol zardap shekken azamattardyń suraqtaryn tyńdap, qalpyna keltirý jumystaryna barynsha kómek kórsetiletinin atap ótti.
Odan ári Anas Baqqojaev "Aýyl" partııasyna múshe 29 adam jumys isteıtin "Mahambet orman jáne janýarlar dúnıesin qorǵaý mekemesi" KMM-de bolyp, ujym qyzmetkerlerimen kezdesip, qazirgi tynys-tirshiligin bilip qaıtty.
Kezdesý aıasynda depýtat "Aýyl" partııasynyń Atyraý oblystyq fılıalynyń bastamasymen osy mekemede qurylǵan bastaýysh uıymnyń jınalysyna qatysty.
– Prezıdenttiń bastamasymen orman sharýashylyǵy qyzmetkerleriniń jalaqysy ósti. Basqa máselelerdi sheshýge de qarjy qarastyryldy. Jumystaryńyz óz deńgeıinde baǵalanyp, barlyq qajetti tehnıkamen, órt sóndirý deposymen qamtamasyz etildi. Endi sizderden sapaly jumys kútemiz, - dedi depýtat.