Kúni keshe ǵana «Álem ádebıeti» halyqaralyq ádebı-kórkem jáne tanymdyq tárjime jýrnalynyń araǵa biraz jyl úzilis salyp, jańa nómiri jaryq kórdi. Eske salaıyq, atalǵan jýrnaldy alǵash ret 2006 jyly «Folıant» baspasy eki aıda bir shyǵaryp, qazaq oqyrmandaryn álem ádebıetiniń nebir áıgili qalamgerleriniń, uly tulǵalarynyń ólmeıtin shyǵarmalarymen, asyl jaýharlarymen tanystyryp keldi. Basylym ádebıet pen baspasóz tarıhynda óz ornyn alyp ta úlgergen edi. Alaıda 2016 jyly qarjylyq qıyndyqqa baılanysty jýrnal jumysy toqtady. Endi, mine, «Álem ádebıeti» qaıta oqyrmandarǵa jol tartty.
Igi istiń bastamashysy – aqyn Ulyqbek Esdáýlettiń aıtýynsha, basylymnyń túr-turpaty ózgerip, halyqaralyq mártebe alyp, qazaq, túrik, aǵylshyn jáne orys tilderinde jaryq kórip otyr. Iаǵnı «Álem ádebıeti» – «Dünya Edebiyatı» – «World literature» – «Mırovaıa lıteratýra» jýrnalynyń jańalyǵy da, basty ereksheligi de osynda. Naqtylap aıtsaq, álem ádebıetiniń eń ozyq úlgileri qazaq tiline tárjimelenip, al qazaq ádebıetiniń tańdaýly týyndylary túrik, aǵylshyn jáne orys tilderinde sheteldik oqyrmandarǵa usynylady.
Aıta keteıik, ádebı jýrnaldyń bas dırektory, Redaksııalyq alqa tóraǵasy – Ulyqbek Esdáýlet, bas redaktory – Erjan Alashtýǵan. Tórt tilde jaryq kórgen jańa sanynda Maqtymquly, Sharl Bodler, Oljas Súleımenov, Hýsto Horhe Padron, Shandor Petefı, Hemıngýeı, basqa da álem avtorlarynyń shyǵarmalary jarııalandy.
«Bul jýrnalda búginnen bastap eki ǵalam ushyrasyp-ushtasyp, ulasyp-toǵysady: qazaq ádebıeti jáne álem ádebıeti! Shalqar teńiz ben uly muhıt! Bógde tilder, bólek tarıhı dáýirler, ózge mádenıet, ózinshe ádebı mektepter, múlde uqsamaıtyn ulttyq erekshelik, basqa dúnıetanym bolǵanymen, bir-birimen úndesetin perneleri de mol. Tek birinen birine kórkemdigin joǵaltpaı, boıaýyn jutatpaı, deńgeıin túsirmeı, mán-maǵynasyn saqtap, sheberlikpen aýdara bilý kerek. Shyntýaıtyna kelgende, qolyńyzdaǵy jýrnal dúnıe júzi ádebıetteriniń arasyndaǵy asyl arnaǵa, berik baılanys arqaýyna, ólmeıtin ótkelge, aınymas altyn kópirge aınalary anyq. Qazaq oqyrmany da, álem oqyrmany da ár nómir saıyn jańa oljaǵa keneletini sózsiz», deıdi Ulyqbek Esdáýlet.
Aıta keteıik, jýrnal úsh aıda eki ret (45 kúnde bir nómir) shyǵady. Basylymnyń alemadebieti.kz elektrondy saıty da iske qosylady. Ádebıet arnasyna qaıta qosylǵan basylymnyń oqyrmany kóp bolsyn deımiz.